धर्बेन्द्र झा
जनकपुरधाम, जेठ ४ गते । मधेश प्रदेशका सभामुख रामअशिष यादवले मधेश प्रदेशसभामा राष्ट्रिय प्रजातन्त्र पार्टी नेपालको समावेशी समूह मधेशीतर्फ रिक्त रहेको प्रदेशसभा सदस्यमा महोत्तरीको गौशाला नगरपालिका वडा १२ का सरिताकुमारी ठाकुरलाई नियुक्त गर्नुभएको छ ।
राष्ट्रिय प्रजातन्त्र पार्टीको सिफारिसको आधारमा निर्वाचन आयोगको वैशाख ३० गते प्राप्त पत्रअनुसार ठाकुर निर्वाचित भएको अधारमा सभामुख यादवले ठाकुरलाई सोमबार नियुक्त गर्नुभएको प्रदेशसभा सचिवालयका प्रवक्ता विपिनकुमार ठाकुरले जानकारी दिनुभयो ।
प्रदेशसभा सदस्य ठाकुरलाई आज सभामुख यादवले पद तथा गोपनीयताको सपथ ग्रहण गराउनुभयो । प्रदेशसभा निर्वाचन ऐन २०७४ को दफा ७५ (१) बमोजिम सभामुख यादवले ठाकुरलाई सपथ ग्रहण गराउनुभएको मधेश प्रदेशसभा सचिवालयले जनाएको छ ।
सो पार्टीले यसअघि प्रदेशसभा सदस्य रहेकी कञ्चन बिच्छालाई पार्टी अनुशासन उल्लङ्घन गरेको आरोप लगाउँदै सांसद पदबाट फिर्ता बोलाएपछि मधेश प्रदेशसभामा उक्त पद रिक्त रहेको थियो ।
सपथ ग्रहण कार्यक्रममा मधेश प्रदेशसभाका सभामुख यादवले प्रदेशसभा सदस्यमा नियुक्त हुनुभएका ठाकुरलाई बधाई दिँदै मधेशको विकास, सुशासन र जनताको हकहितमा ठाकुरले महत्वपूर्ण भूमिका निर्वाह गर्नेमा आफू आशावादी रहेको बताउनुभयो ।
-original-thumb.jpg)
