चाँदनी आचार्य
घोडाघोडी(कैलाली) असार १ गते । सुदूरपश्चिम प्रदेशकै गौरवको योजना निर्माणमा ठेकेदारले चरम लापरबाही गरेको जनाइएको छ । कैलालीको घोडाघोडी नगरपालिका वडा नम्बर १ स्थित राष्ट्रिय माध्यमिक विद्यालयमा बन्दै गरेको विशेष विद्यालयको भौतिक संरचना निर्माणमा सम्झौता बमोजिम सिमेन्टको प्रयोग नभएपछि ढलान गरिएको बिम भत्काइएको हो ।
सनिबार दिउँसो स्थानीयले ओपीसि सिमेन्टको ठाउँमा पिपीसी सिमेन्ट प्रयोग गरी बेसको बिम ढलान गरेको कार्य प्रति आपत्ति जनाउँदै अनुगमनका लागि नगरपालिकालाई खबर गरेका थिए । निर्माणको जिम्मा पाएको मस्टा निर्माण कम्पनीले बिदाको दिन पारेर एकदुई बोरा ओपीसि सिमेन्ट राखेर ७० बोराजति पिपीसी सिमेन्ट प्रयोगगरि निर्माण गरेको बेसको बिम ढलान तत्काल भत्काउन लगाइएको छ ।
घोडाघोडी नगरपालिकाका नगर प्रवक्ता तथा वडा नम्बर १ का वडाध्यक्ष घनश्याम ओझाले ओपीसिको ठाउँमा पिपीसि सिमेन्ट प्रयोग भएको जानकारी पाउनासाथ अनुगमनमा गई निर्माणमा खटिएका लेबर मिस्त्री द्धारानै ढलान भत्काएको बताउनुभयो । उहाँले ढलानमा ओपीसि सिमेन्ट प्रयोग गर्न ठेकेदारलाई निर्देशन दिएको बताउनुभयो ।
सङ्घीय सरकारको अनुदान सहयोगमा निर्माण हुँदै गरेको उक्त विद्यालय २०७७ सालमा बजेट आए पनि जग्गा विवादका कारण निर्माणमा ढिलाइ भएको थियो । राष्ट्रिय माध्यमिक विद्यालयले व्यापारीलाई भाडामा दिएको जग्गा खाली गरेपछि वैशाखबाट निर्माण सुरु भएको हो ।
फरक क्षमता भएका विद्यार्थीहरुकालागि आवासीय नमुना विशेष विद्यालयको निर्माण लागत २ करोड १६ लाख रुपैयाँ रहेकोे छ । विद्यालयको नाममा स्रेस्ता कायम रहेको ८ कट्ठा क्षेत्रफलको कित्ता नं ९७ मा बन्दै गरेको भवन आगामी २०८३ सालको असार महिनासम्ममा निर्माण सम्पन्न गर्ने लक्ष्य लिइएको छ ।
