काठमाडौँ, चैत २२ गते । सत्तारुढ दल नेपाली कांग्रेसले विद्यालय शिक्षा विधेयक शिक्षक महासङ्घसँग विगतमा भएका सम्झौताअनुसार छिटो आउनुपर्ने बताएको छ । देशभरका शिक्षकहरूले काठमाडौँमा अहिले विद्यालय शिक्षा विधेयक जारी गर्न माग गर्दै आन्दोलन गरिरहेका छन् । सरकारले संसदको हिउँदे अधिवेशनबाट शिक्षा विधेयक पारित गर्ने भनेपनि पारित नगरी अधिवेशन अन्त्य गरेको छ ।
शिक्षकहरूको आन्दोलनसँगै नेपाली कांग्रेसले शिक्षक सङ्घ सङ्गठनसँग विगतमा भएका सम्झौताहरू अक्षरशः कार्यान्वयन गर्दै यथाशिघ्र विधेयक पास हुनुपर्ने बताएको छ । न्यूज एजेन्सी नेपालसँगको कुराकानीमा नेपाली कांग्रेसका शिक्षा विभाग प्रमुख नैनसिंह महरले शिक्षकहरूसँग सरकारले विगतमा गरेका सम्झौता कार्यान्वयनको ग्यारेन्टी लिनुपर्ने र यथाशिघ्र संसदबाट विधेयक पारित गर्नुपर्ने बताउनुभयो ।
उहाँले भन्नुभयो, ‘‘सरकारले हिजो शिक्षक महासङ्घसँग भएका सम्झौताहरू कार्यान्वयनको ग्यारेन्टी गर्नुपर्छ । त्यो बिल यथाशक्य संसदबाट हामी पास गर्छौं । समिति र उपसमितिले यो बिचमा पनि काम गर्नुपर्छ । सँगै संसद् अन्त्य छ, संसद् गैरजिम्मेवार हुनु भएन । संसदले कानुन निर्माण गर्ने सवालमा जुन अकर्मण्यता देखाएको छ, त्यसलाई सुधार गर्नुपर्छ ।’’
उहाँले संसदले कानुन निर्माण गर्ने सवालमा अकर्मण्यता देखाएको आरोप लगाउँदै विद्यालय शिक्षा विधेयक बनाउनका लागि सबैले सम्झौता गरेर अघि बढ्न जरुरी रहेको औंल्याउनुभयो । शिक्षाको प्रारम्भिक बालविकासदेखि उच्च शिक्षासम्म भ्वाङ परेको उल्लेख गर्दै यसलाई सुधार गर्नेगरी विधेयक ल्याउनुपर्नेमा जोड दिनुभयो । सबैले अधिकार मात्रै खोज्ने नभइ कर्तव्यवोध गर्न जरुरी रहेको उल्लेख गर्नुभयो ।
शिक्षा विभाग प्रमुख महरले शिक्षक सङ्घ सङ्गठनसँग नेपाल सरकारले विगतमा शिक्षा विधेयक यथाशिघ्र पास गर्नेदेखि शिक्षा भित्रका सुधारका बारेमा भएका सम्झौताको अक्षरशः पालना हुनुपर्छ भन्ने कांग्रेसको धारणा र अडान रहेको जिकिर गर्नुभयो । सङ्घीय लोकतान्त्रिक गणतन्त्रको संविधान बनाइकेपछि संसदहरूले बनाउनुपर्ने कानुनहरू तीन सयभन्दा बढी रहेको उल्लेख गर्नुहुँदै यथाशिघ्र उक्त कानुनहरू बनाउनुपर्ने बताउनुभयो । सडकमा भइरहेको शिक्षकहरूको आन्दोलनबारे सरकार र सदन बेखबर बन्न नहुने उहाँको भनाइ छ ।
‘‘शिक्षक सङ्घ सङ्गठनसँग नेपाल सरकारले विगतमा शिक्षा विधेयक यथाशिघ्र पास गर्नेदेखि लिएर जति शिक्षा भित्रका सुधारका बारेमा एग्रिमेन्ट गरेको छ, त्यसको अक्षरशः पालना हुनुपर्छ भन्ने कांग्रेसको धारणा र अडान हो । सङ्घीय लोकतान्त्रिक गणतन्त्रको संविधान बनाइकेपछि संसदहरूले बनाउनुपर्ने कानुनहरू हाम्रो तीन सयभन्दा बढी बाँकी छन् । संविधानलाई ब्याक अप गर्ने एउटा थिति बसाउने, जनतालाई अलिकति सहुलियत व्यवहारमा लैजाने, सुशासन कायम गर्ने सवालका समेत कानुनहरू छन् ।,’’ उहाँले भन्नुभयो, ‘‘अख्तियारको कानुन आज पाँच वर्ष भइसक्यो संसदमा छ, पास हुन सकेको छैन । यस्ता विधेयक र कानुनहरू निर्माण गर्ने सवालमा संसद आज व्यक्तिगत र पार्टीगत तवरबाट अलिकति अयोग्यताको शिकार हुँदै छन् जस्तो मलाई लागिरहेको छ ।’’
शिक्षा विभाग प्रमुख महरले फास्ट ट्रयाकमा शिक्षा पारित गरेर शिक्षकहरूका माग सम्बोधन गर्न आग्रह गर्नुभयो । संसदको बजेट अधिवेशन सुचारु भएको एक हप्ताभित्रै शिक्षा विधेयक पारित गर्नेगरी अघि बढ्नुपर्नेमा जोड दिनुभयो ।
