ज्योति पन्थी
बर्दिया, चैत १५ गते । गुलरियाको हिमाली आधारभूत विद्यालय र कृष्णसार आधारभूत विद्यालयका किशोर किशोरी आजभोलि साथीहरू सँग खुलेरै यौन तथा प्रजनन स्वास्थ्यका कुरा गर्दछन् ।
गुलरियामा रहेको राधाकृष्ण थारु जनसेवा केन्द्रले हिमाली आधारभूत विद्यालय र कृष्णसार आधारभूत विद्यालयका किशोर किशोरीलाई दौँतरी शिक्षा तालिम दिए पछि उनीहरू खुलेर यौन तथा प्रजनन स्वास्थ्यका कुरा गर्ने भएका हुन ।
गुलरियाको राधाकृष्ण थारु जनसेवा केन्द्रले हिमाली आधारभूत विद्यालयका १० जना र कृष्णसार आधारभूत विद्यालयका १० जना गरी २० जनालाई दौँतरी शिक्षाको तालिम दिए पछि उनीहरू आजभोलि खुलेर यौन तथा प्रजनन स्वास्थ्यका कुरा गर्ने भएका हुन । विद्यालयमा मात्र हैन विद्यालय समय भन्दा बाहिर फुर्सदको समयमा पनि उनीहरू आफ्ना साथीहरूको घरमा गएर बाल विवाह नगर्न, प्रजनन स्वास्थ्यका कुरा साथीभाइ सहित साथीहरूका अभिभावकलाई सम्झाउने गर्दछन् । आफूले विद्यालयमा अध्ययन गरेको विषय र तालिममा आफूहरूले पाएको ज्ञान तालिम नलिएका साथीहरूमा बाडन पाउँदा निकै खुसी लागेको कृष्णसार आधारभूत विद्यालयकी छात्रा लक्ष्मी गोडियाले बताउनु भयो ।
आफूहरूले पाँच दिन सम्म लिएको तालिम समुदाय र आफ्ना साथी भाइ समक्ष सुनाउन र सजग गराउन खाली समयको समेत सदुपयोग भएको र किशोर किशोरीको यौन तथा प्रजनन अधिकारका विषयमा आफूहरूले कुरा गर्ने गरेको हिमाली आधारभूत विद्यालयका छात्र मोहम्मद हुसैनले बताउनु भयो । राधाकृष्ण थारु जनसेवा केन्द्रले गत वर्ष देखि गाउँ स्तरमा रहेका विद्यालयहरूमा स्वच्छ खानेपानी र किशोर किशोरीको यौन तथा प्रजनन स्वास्थ्य सम्बन्धी चेतनामूलक काम गर्दे आई रहेको राधाकृष्ण थारु जनसेवा केन्द्रका अध्यक्ष दिनेश प्रसाद श्रेष्ठले बताउनु भयो ।
विद्यालयमा अध्ययन गर्ने अधिकांश बालबालिका मधेसी समुदायका भएकोले उनीहरूलाई उनीहरूको स्वास्थ्य सबल बनाउनका लागि किशोर किशोरी यौन तथा प्रजनन स्वास्थ्य र अधिकार परियोजना अन्तर्गत दौँतरी शिक्षा मार्फत उनीहरूलाई तालिम दिए पछि उनीहरूले साथीहरू सँग यौन तथा प्रजनन स्वास्थ्यका कुरा गरुन् र स्वास्थ्य सबल होस भन्ने उद्देश्यले तालिम दिइएको राधाकृष्ण थारु जनसेवा केन्द्रका कर्मचारी सुमित्रा पौडेलले बताउनु भयो ।
