गोरखापत्र समाचारदाता
काठमाडौँ, फागुन १८ गते । यस वर्ष खाद्यान्न आयात बढेको छ । भन्सार विभागको तथ्याङ्क अनुसार चालु आर्थिक वर्ष २०८१/८२ को पहिलो सात महिनामा गत वर्षको सोही अवधिको भन्दा आठ अर्ब रुपियाँ धेरैको अन्न आयात भएको छ । विभाग अनुसार यस वर्ष ३६ अर्ब ३५ करोड ७३ लाख २९ हजार रुपियाँको धान, चामल, मकै, गहुँ र कोदो आयात भएको छ । गत वर्ष सो अवधिमा २८ अर्ब २१ करोड १६ लाख ८१ हजार रुपियाँको खाद्यान्न आयात भएको थियो । स्थानीय उत्पादनले माग धान्न नसक्दा खाद्यान्न आयातमा वृद्धि भएको हो ।
विभागका अनुसार यो अवधिमा १० अर्ब ७७ करोड ६६ लाख ४१ हजार रुपियाँको चामल आयात भएको छ । जुन गत वर्षको समीक्षा अवधिमा छ अर्ब ६८ करोड ४० लाख २६ हजार रुपियाँको आयात भएको थियो । यस्तै सात महिनामा १४ अर्ब ५९ करोड ८५ लाख ९१ हजार रुपियाँको धान आयात भएको छ । गत वर्ष सो अवधिमा सात अर्ब ४२ करोड ४६ लाख ४७ हजार रुपियाँको धान आयात भएको थियो । गत वर्षको तुलनामा धान आयात दोब्बरले बढेको छ । यस वर्ष चामलभन्दा बढी धान आयात भएको छ ।
यस्तै सात महिनामा १० अर्ब ७२ करोड ६६ लाख रुपियाँको मकै आयात भएको छ । गत वर्ष सो अवधिमा सात अर्ब ७२ करोड ४१ लाख ३१ हजार रुपियाँको मकै आयात भएको छ । कुखुराको दानाका लागि ठुलो परिणाममा मकै आयात हुने गर्छ । यस वर्ष धानको उत्पादन बढे पनि खाद्यान्न आयात भने कमी हुन सकेको छैन । कृषि तथा पशुपन्छी विकास मन्त्रालयका अनुसार यस वर्ष ५९ लाख ५५ हजार मेट्रिक टन धान उत्पादन भएको थियो । मुलुकमा वार्षिक ६५ देखि ७० लाख मेट्रिक टन धानको आवश्यक पर्ने बताएको छ । स्थानीय माग अनुसार धानको उत्पादन नहुुँदा ठुुलो परिणाममा धान आयात भएको छ । मन्त्रालयका वरिष्ठ तथ्याङ्क अधिकृत रामकृष्ण रेग्मीले स्थानीय उत्पादनले माग धान्न नसक्दा र मसिनो बास्नादार चामलको प्रयोग धेरै हुुन थालेपछि चामल आयातमा वृद्धि भएको जानकारी दिनुभयो । पछिल्लो समय खेतीयोग्य जमिन घडेरीमा प्रयोग हुँदै गएको र काम गर्ने युवा जनशक्ति वैदेशिक रोजगारीमा गएकाले माग अनुसार खाद्यान्न उत्पादन हुन सकेको छैन ।
