उखु बोकेको ट्याक्टर सडकमै पल्टियो

जनार्जन खत्री

सर्लाही, फागुन ३ गते। नयाँरोड-बरहथवा सडक अन्तर्गत सर्लाहीको मुर्तिया जङ्गलमा शनिबार दिउँसो उखु बोकको ट्याक्टर अनियन्त्रित भई सडकमै पल्टिएको छ। 

बरहथवातर्फबाट उखु लोड गरेर हरिवनस्थित इन्दुशङ्कर चिनी उद्योगतर्फ आउँदै गरेको ना. १ त. ४६२४ नम्बरको ट्याक्टर मुर्तिया जङ्गलमा अनियन्त्रित भई पल्टिएको हो। दुर्घटनामा कुनै मानवीय क्षति भने नभएको इलाका प्रहरी कार्यालय बरहथवाका डीएसपी गौतम थापाले जानकारी दिनुभयो। 

ट्याक्टर पल्टिँदा उखु सडकमै थुप्रिएको थियो। दुर्घटनापछि एकतर्फी सञ्चालन भएको नयाँरोड–बरहथवा सडकमा बरहथवा नगरपालिकाबाट आएको जेसिबीले सडक पन्छाएपछि दुईतर्फी रूपमै सडक सञ्चालन भएको बरहथवा प्रहरीले जनाएको छ। 

सर्लाहीका उखु किसानको उखु धमाधम काटेर चिनी मिलमा लैजाने काम गरिरहेका छन्। पटक–पटक लैजाँदा ढुवानी खर्च बढ्ने भन्दै किसानले ट्याक्टर र ट्रकमा क्षमता भन्दा बढी उखु लोड गरेर चिनी मिलसम्म पुुर्‍याउने गरेका छन्।