लक्ष्मी चौधरी
जनकपुरधाम, माघ २७ गते । नेपाल लाटोकोसेरो तथा हुचिल उत्सव २०८१ को अवसरमा वातावरण संरक्षण, वन्यजन्तु र पर्यापर्यटन विकासमा पत्रकारिताको माध्यमबाट महत्वपूर्ण योगदान पुर्याएवापतमा गोरखापत्रका ढल्केबर समाचारदाता विजयकुमार साहलाई प्रकृति संरक्षण पुरस्कार प्रदान गरिएको छ ।
धनुषाको पुरन्दाहामा आयोजित दुई दिने नेपाल लाटोकोसेरो तथा हुचिल उत्सव २०८१ को समापन समारोहका अवसरमा सो पुरस्कार गोरखापत्रकर्मी साहलाई प्रदान गरिएको हो । कार्यक्रममा विश्व लाटोकोसेरो कोष बेलायतका नेपाल प्रतिनिधि राजु आचार्यले सम्मानपत्रसहित पुरस्कार प्रदान गर्नुभएको थियो ।
सञ्चारकर्मी साहले स्थानीयस्तरमा वन्यजन्तु संरक्षण, वातावरणीय सचेतना र पर्यापर्यटन प्रवद्र्धनका विषयमा खबरदारीमूलक पत्रकारिता गर्दै आउनुभएको छ। उहाँको यो प्रयासले स्थानीय र राष्ट्रियस्तरमा जनचेतना अभिवृद्धिमा सहयोग पुगेको भन्दै नेपाल लाटोकोसेरो तथा हुचिल उत्सव समिति धनुषाले उहाँलाई पुरस्कृत गरेको हो ।
कार्यक्रमका अतिथि राजु आचार्यले साहको योगदानलाई प्रशंसा गर्दै पत्रकारितामार्फत वातावरण र जैविक विविधताको संरक्षणमा समाजमा सकारात्मक प्रभाव परेको उल्लेख गर्नुभयो । यस अवसरमा स्थानीय वन्यजन्तु प्रेमी, विद्यार्थी र पत्रकारको बाक्लो उपस्थिति थियो ।
उत्सवको क्रममा जैविक विविधता, लाटोकोसेरोको संरक्षण र पर्यापर्यटनका सम्भावनाबारे विभिन्न कार्यशाला, प्रदर्शनी र जनचेतनामूलक कार्यक्रम पनि आयोजना गरिएको थियो । उत्सवले स्थानीय समुदायमा वातावरणीय सचेतना फैलाउन महत्वपूर्ण भूमिका खेलेको आयोजकको भनाइ छ ।
