रमेश विश्वकर्मा
गुल्मी, माघ २१ गते । सत्तारुढ दल नेपाली कांग्रेस र नेकपा (एमाले) को गुल्मी जिल्लास्तरीय संयन्त्रको संयुक्त बैठकले जिल्लाको सबै तहमा पालिकास्तरीय संयन्त्र गठन गरी संयुक्त बैठक गर्ने निर्णय गरेको छ ।
नेपाली कांग्रेस गुल्मीको जिल्ला पार्टी कार्यालय बीपी स्मृति भवन तम्घासमा बसेको जिल्लास्तरीय संयन्त्रको संयुक्त बैठकले सो निर्णय गरेको हो ।
कांग्रेस गुल्मीका सभापति खिलध्वज पन्थीको सभापतित्वमा आइतबार भएको बैठकमा सहभागी नेताहरुले कांग्रेस र एमालेबिचको गठबन्धनले नेपालमा राजनैतिक स्थिरताको वातावरण तयार भएको साझा धारणा व्यक्त गर्नुभएको थियो । कांग्रेस र एमालेको गठबन्धन सरकार बनेपछि कांग्रेस एमालेको जिल्लास्तरीय संयन्त्रको बैठक औपचारिक रुपमा पहिलो पटक भएको हो ।
बैठकमा जिल्लाको समसामयिक विषयमा विस्तृत छलफल भएको कांग्रेस गुल्मीका सचिव भगतसिंह खड्काले जानकारी दिनुभयो । देशका दुई ठुला दलबिचको गठबन्धनलाई स्थानीय तहसम्म प्रभावकारी बनाउन जिल्लाका १२ वटै पालिकामा पालिकास्तरका संयन्त्र गठन गरी विभिन्न गतिविधिमा समान धारणा बनाएर अगाडि बढ्ने निर्णय गरिएको उहाँले बताउनुभयो ।
जिल्लाभित्रका विभिन्न समस्यालाई साझा समस्याका रुपमा लिएर छलफलद्वारा समाधान गरिने बताइएको छ । जिल्लास्तरीय संयन्त्रको संयुक्त बैठकले गुल्मीमा कांग्रेस र एमालेबिचको सम्बन्धलाई सुदृढ र प्रगाढ बनाउने भन्दै एमाले गुल्मीका सचिव धर्म विश्वकर्माले समग्र जिल्लाको विकासमा हातेमालो गरेर अगाडि बढ्न सहज हुनेभएको बताउनुभयो । संयन्त्रको बैठक महिनामा कम्तीमा एक पटक अनिवार्य बस्ने र आवश्यकता अनुसार थप बस्ने भएको छ । दुई दलले एक–एक महिना पालोपालो संयन्त्रको संयोजन गर्ने भएका छन् ।
जिल्लास्तरीय संयन्त्रको संयुक्त बैठकमा कांग्रेस गुल्मीका सभापति खिलध्वज पन्थी, कांग्रेस लुम्बिनी प्रदेश सदस्य छन्दबहादुर पहराई, कांग्रेस गुल्मीका उपसभापति शिवबहादुर खत्री, कांग्रेस गुल्मीका सचिव भगत सिंह खड्का, एमालेका केन्द्रीय सदस्य जंग नेपाली, एमाले गुल्मीका अध्यक्ष बालसिंह काउछा र एमाले गुल्मीका सचिव धर्म विश्वकर्माको उपस्थिति रहेको थियो ।
-original-thumb.jpg)
