गोकर्ण पौडेल
तुलसिपुर, पुस २७ गते । नेकपा (एमाले) का महासचिव शंकर पोखरेलले विद्यार्थीलाई स्वदेशमै बस्ने वातावरण तयार पार्न आग्रह गर्नुभएको छ । नेपाल राष्ट्रिय शिक्षक सङ्गठन जिल्ला कमिटी दाङको शनिबार भवन उदघाटन गर्दै महासचिव पोखरेलले देशमा गणतन्त्र स्थापना गर्न शिक्षकहरूको महत्त्वपूर्ण भूमिका रहेको बताउनुभयो ।
विद्यार्थीलाई नेपालमै केही गरौं भन्ने भावना विकास गर्न शिक्षक नै अग्रसर हुनुपर्ने उहाँको भनाइ छ । शिक्षक सङ्गठन दाङका अध्यक्ष मीनराज शर्माको अध्यक्षतामा सम्पन्न कार्यक्रममा महासचिव पोखरेलले गरिब मुलुकले उत्पादन गरेको शैक्षिक जनशक्ति सम्पन्न मुलुकले प्रयोग गरेको भन्दै त्यसको अन्त्य गर्नुपर्ने बताउनुभयो । कार्यक्रमका प्रमुख अतिथि रहनुभएका पोखरेलले देश बनेन भन्ने गलत भाष्यलाई चिर्न समाजमा शिक्षकको भूमिका महत्त्वपूर्ण रहने बताउनुभयो ।
