दिपकप्रसाद गौतम
वीरगञ्ज, पुस २४ गते । पर्साको पोखरिया नगरपालिका वडा नम्बर ८ जगतपुरमा ८० वर्षीय रामजान देवानको हत्या आरोपमा पर्सा प्रहरीले उनका नाति र नातिनीलाई पक्राउ गरेको घटना सार्वजनिक भएको छ ।
प्रहरीले मङ्गलबार २० वर्षीया खुश्बु खातुन र १८ वर्षीय काबुल देवानलाई आफ्नै ८० वर्षीय हजुरबुबा रामजान देवानको हत्या गरेको आरोपमा अनुसन्धान गर्नका लागि नियन्त्रणमा लिएको हो ।
जिल्ला प्रहरी कार्यालय पर्साका प्रवक्ता, प्रहरी नायब उपरीक्षक किशोर लम्सालका अनुसार घरायसी विवादको क्रममा सोमबार राति रामजानमाथि कुटपिट गरिएको थियो ।
कुटपिटबाट गम्भीर घाइते भएका रामजानलाई वीरगञ्जको हेल्थ केयर अस्पताल हुँदै न्युरो अस्पताल लगिए पनि उपचारको क्रममा मंगलबार बिहान मृत्यु भएको थियो । अनुसन्धानका क्रममा कुटपिटमा संलग्न देखिएका नाति नातिनालाई प्रहरीले नियन्त्रणमा लिएको हो ।
