कोकिला भण्डारी
धनकुटा, पुस ११ गते। २१ जना यात्रु सवार हायस धनकुटा नगरपालिका ३ स्थित निगालेमा दुर्घटना हुँदा दुई जना सामान्य घाइते भएका छन्।
बिहीबार दिउँसो १ बजेतिर तेह्रथुम जिल्लाको तिनजुरेस्थित पाथीभरा देविको दर्शन गरेर फर्कने क्रममा धनकुटा जिल्लास्थित धनकुटा नगरपालिका ३ स्थित निगालेमा हायस दुर्घटना भएको हो।
तेह्रथुमबाट राजविराजतर्फ जाने क्रममा प्र. २–०१–००१ ख. ०३१० नम्बरको हायस अनियन्त्रित भएर दुर्घटना भएको जिल्ला प्रहरी कार्यालय धनकुटाले जनाएको छ।
जिल्ला प्रहरी कार्यालय धनकुटाका प्रहरी निरीक्षक विष्णु खड्काका अनुसार दुर्घटनामा घाइते हुनेमा राजविराज नगरपालिका–७ का २१ वर्षीय सन्तोषकुमार यादव र १८ वर्षीय अजयकुमार खंग हुनुहुन्छ।
हायसमा सवार यात्रुलाई गन्तव्यतर्फ पठाइसकिएको प्रहरी निरीक्षक खड्काले जानकारी दिनुभयो। सप्तरीका ३५ वर्षीय विष्णु रजकले चलाएको हायस दुर्घटना हुनासाथ तत्काल चालक भने फरार रहेकाले खोजी कार्य भइरहेको प्रहरीले जनाएको छ। घाइतेको हात र खुट्टामा चोट लागेको प्रहरीले जनाएको छ।
