ढाका, पुस ९ गते । एक टेलिभिजन स्टेसनका लगानीकर्ताको कार्यालयमा बङ्गलादेशी विद्यार्थी प्रदर्शनकारीहरूको एक समूहले ‘प्रचार’ गरेको आरोप लगाउँदै प्रवेश गरेको प्रदर्शनकारीहरूले मङ्गलबार बताएका छन् । त्यसपछि कम्तीमा पाँच पत्रकारलाई बर्खास्त गरिएको छ ।
विद्यार्थीहरूले अगस्ट क्रान्तिमा भाग लिएका थिए । उक्त क्रान्तिले प्रधानमन्त्री शेख हसिनालाई सत्ताच्यूत गरेको थियो । हसिनाको कार्यकाल मिडिया स्वतन्त्रताका लागि सबैभन्दा खराब अवधिको रूपमा चिनिन्थ्यो । भेदभाव विरोधी विद्यार्थी आन्दोलनका संयोजक हसनत अब्दुल्लाह डिसेम्बर १७ मा १५ देखि २० जना विद्यार्थीको नेतृत्व गर्दै सिटी ग्रुपको कार्यालयमा पग्नुभएको थियो । सिटी ग्रुपले सोमोय टेलिभिजनमा लगानी गर्छ ।
“सोमोय टेलिभिजनले प्रचार प्रसार गरिरहेको थियो, मेरो टिप्पणीलाई घुमाउरो तुल्याइरहेको थियो र एक पतीत राजनीतिक पार्टीको विचारलाई समायोजन गरिरहेको थियो”, हसनतले भन्नुभयो, “हामी प्रेस स्वतन्त्रताका कट्टर समर्थक हौँ तर प्रेस निष्पक्ष रहनुपर्छ ।”
उहाँले माग राख्नमा कुनै समस्या नदेखेको बताउँदै तर विद्यार्थीहरूले बर्खास्त गर्न चाहेकाहरूको सूची बुझाएको भन्ने खबरलाई अस्वीकार गर्नुभयो ।
टेलिभिजन स्टेसनलाई वित्तपोषण गर्ने व्यापारिक समूहका प्रबन्ध निर्देशकले टिप्पणीका लागि बारम्बार अनुरोधमा कुनै जवाफ दिएनन् ।
यो घटनाले क्रान्तिपछि पत्रकारहरू माझ त्रास बढाएको छ । टेलिभिजन स्टेशनका वरिष्ठ सम्पादक ओमर फारुकले पाँच जनामध्ये आफू पनि बिना कारण बर्खास्तीको पत्र पाउनेमा परेको बताउनुभयो । “टेलिभिजन प्रशासनले स्टेशनको बृहत्तर हितका लागि हामीमध्ये केहीलाई पद छोड्न अनुरोध ग¥यो”, फारुकले भन्नुभयो, “हामीले निर्णयको व्याख्या माग्यौँ तर प्रशासनले कुनै व्याख्या दिन अस्वीकार ग¥यो ।”
अन्तरिम नेता मुहम्मद युनुसले मिडिया स्वतन्त्रता चाहेको बारम्बार जोड दिनुभएको छ । युनुसका प्रेस सचिव शफिकुल आलमले यदि कसैले ‘कुनै कारबाही गर्छ भने जिम्मेवारी उनीहरूको हो’ भन्दै सरकारलाई टाढा राख्न खोज्नुभएको थियो ।
प्रेस वाचडगहरूका अनुसार धेरै पत्रकारले विगतका कामका लागि स्पष्ट प्रतिशोधमा प्रहरी अनुसन्धानको सामना गरिरहेका छन् । ती पत्रकारलाई आलोचकहरूले हसिना सत्तामा हुँदा उहाँको समर्थन गरेको मान्छन् ।
कम्तीमा चारजना पत्रकार जेलमा परेका छन् र देशभरि थुप्रै कानूनी मुद्दाहरूको सामना गरिरहेका छन् ।
हसिना र उहाँको सरकारले अखबार र टिभी च्यानलहरू बन्द गर्ने र पत्रकारहरूलाई कैद गर्ने लगायतका मुट्ठीभर स्वतन्त्र मिडिया आउटलेटहरूमा अनावश्यक दबाब दिएको आरोप लगाइएको थियो ।
हसिनाको सरकार ढलेपछि सोमोय टिभी लगायत केही टिभी च्यानलहरू उहाँको आवामी लिगप्रतिको कथित निष्ठाका कारण आक्रमणको शिकार भए ।
नोभेम्बरमा प्रदर्शनकारीहरूले सबैभन्दा ठूलो बङ्गला भाषाको समाचारपत्र प्रथम आलोको कार्यालय घेराउ गरेका थिए र द डेली स्टारसहित यसलाई बन्द गर्ने धम्की दिएका थिए ।
बङ्गलादेशमा प्रेस स्वतन्त्रता लामो समयदेखि खतरामा छ । रिपोर्टर्स विदाउट बोर्डर्सका अनुसार बङ्गलादेश प्रेस स्वतन्त्रतामा १८० देशमध्ये १६५ औँ स्थानमा छ । रासस, एएफपी
