फडिन्द्र अधिकारी
लेखनाथ, पुस ८ गते । जिल्ला अदालत कास्कीमा सोमबारबाट पूर्वगृहमन्त्री एवम् राष्ट्रिय स्वतन्त्र पार्टी(रास्वपा) सभापति रवि लामिछानेसहित प्रतिवादीको बयान र थुनछेक बहस सुरु भएको छ । आइतबार ४४ जनाविरुद्ध जिल्ला सरकारी वकिलको कार्यालय कास्कीले अभियोगपत्र दर्ता गरेपछि सोमबारबाट बयान सुरु भएको हो । न्यायाधीश नीतिज राईको इजलासमा सूर्यदर्शन बचत तथा ऋण सहकारी ठगीसम्बन्धी मुद्दा परेको छ । गोरखा मिडिया नेटवर्कका पूर्वउपाध्यक्षसमेत रहनुभएका छविलाल जोशीको बयान लिन सुरु भएको हो ।
जोशी पूर्व प्रहरी नायब महानिरीक्षकसमेत हुनुहुन्छ । जोशीकै निवासबाट प्रहरीले सहकारीको सफ्टवेयर बरामद गरेको थियो । आइतबार कार्यालय समय अभियोगपत्र दर्ता गर्दै सकिएपछि सोमबारबाट बयान लिन थालिएको हो । जिल्ला अदालत कास्कीका सूचना अधिकारी सुरज अधिकारीले न्यायाधीशले मिसिल अध्ययन गरेपछि बयान सुरु भएको जानकारी दिनुभयो ।
“अहिले छविलाल जोशीको बयान सुरु भएको छ,” अधिकारीले भन्नुभयो । जोशीलाई असोज ६ गते काठमाडौंबाट प्रहरीले नियन्त्रणमा लिएको थियो । न्यायाधीश राईको इजलासबाट बयानदेखि थुनछेक बहससम्मको निर्णय हुनेछ । थुनछेक बहसपछि प्रतिवादीहरुलाई पुर्पक्षका लागि थुनामा पठाउने, धरौटीमा छाड्ने वा साधारण तारिखमा छाड्नेमध्ये एक निर्णय हुने छ ।
सूर्यदर्शन सहकारी ठगी प्रकरणमा ३१ व्यक्ति, आठ कम्पनी र जफत प्रयोजनका लागि पाँच व्यक्ति गरी ४४ जनाविरुद्ध मुद्दा दर्ता भएको छ । गोरखा मिडिया नेटवर्कका पूर्व प्रबन्ध निर्देशकसमेत रहनुभएका लामिछानेसहित पूर्वउपाध्यक्ष छविलाल जोशी, कर्मचारी लीला पछाई, कृष्ण गुरुङ र रामबहादुर खनालको बयान हुनेछ ।
सूर्यदर्शन सहकारीमा पूरक र थप सबै गरी ६३ जना प्रतिवादी कायम भएका छन् । लामिछाने लगायतलाई सम्पत्ति शुद्धिकरण, सहकारी ठगी र सङ्गठित अपराध अभियोग लगाइएको छ । सम्पत्ति शुद्धिकरणमा लामिछानेविरुद्ध २७ करोड ८९ लाख ४४ हजार सात सय पाँच रुपैयाँको मागदाबी लिइएको छ । जोशीविरुद्ध भने ७४ करोड ३४ लाख सात हजार एक सय ५५ रुपियाँ बिगो कायम गरिएको छ ।
कास्की प्रहरीले सूर्यदर्शन सहकारीको ठगीबारे तीन महिनाभन्दा बढी समयको अनुसन्धानपछि पुस २ गते सरकारी वकिल कार्यालय कास्कीमा प्रतिवेदन बुझाएको थियो । अभियोगपत्रमा एक अर्ब ५१ करोड ४० लाख १९ हजार एक सय ९४ रुपियाँ बिगो मागदाबी लिइएको छ ।
सूर्यदर्शन प्रकरणमा रामबहादुर खनाल, दीपेशकुमार पुन, नेत्रपाणि बास्तोला, देवेन्द्रबाबु राई, विज्ञान राई, विश्वविक्रम राई, विशाल तामाङ, नवीन अछामी, रविना रिमाल, असरफ अली सिद्दिकी, दीपक लामा, अनन्तबाबु राई र ओमप्रकाश गुरुङलाई प्रतिवादी बनाइएको छ ।
यस्तै, वीरबहादुर रानाभाट, दीपा न्यौपाने, कल्पनाकुमारी श्रेष्ठ, ज्ञानबहादुर बम्जन, मीना गुरुङ, सूर्यध्वज न्यौपाने, आरती गुरुङ, लीलाबहादुर गुरुङ, पेशलकुमार राई, कृष्णबहादुर गुरुङ, देवकुमार नेपाली, शकुन्तला गुरुङ, मिश्रकुमारी गुरुङ, रितु ताम्राकार र लक्ष्मीप्रसाद पौडेलविरुद्ध पनि मुद्दा दर्ता भएको छ । यसअघि मूल अभियोगमा सहकारी ठगीका मुख्य योजनाकार गीतेन्द्रबाबु(जिबी) राईसहित १९ जना विरुद्ध शुक्रबार नै थप अभियोग दर्ता भइसकेको छ ।
