गोरखापत्र समाचारदाता
काठमाडौँ, मङ्सिर २७ गते । नेपालका लागि मलेसियाका कार्यवाहक राजदूत मोहम्मद फिरदस आजमानले नेपालीलाई मलेसिया घुम्न जान आग्रह गर्नुभएको छ । मलेसियाली राजदूत आजमानले बुधबार काठमाडौँमा सञ्चारकर्मीसँग कुराकानी गर्दै मलेसिया प्राकृतिक तथा सांस्कृतिक हिसाबले पर्यटकका लागि निकै आकर्षक गन्तव्य मुलुक भएकाले एक पटक घुम्न जान आग्रह गर्नुभएको हो । नेपालीका लागि रोजगारीको हिसाबले पनि मलेसिया आकर्षक तथा प्रमुख श्रम गन्तव्य रहेको भन्दै उहाँले नेपाली श्रमिक अन्य देशको तुलनामा असाध्यै पारिश्रमिक र इमानदार रहेको चर्चा गर्नुभयो ।
राजदूत आजमानले हाल साढे चार लाख नेपाली कार्यरत रहेको मलेसियामा थोरै खर्चमा धेरै ठाउँमा घुमफिर गर्न सकिने पनि बताउनुभयो । उहाँका अनुसार मलेसिया सरकारले सन् २०२६ लाई भ्रमण वर्ष घोषणा गरी जति सक्दो ठुलो सङ्ख्यामा पर्यटक भित्र्याउने लक्ष्य अघि सारेको छ । मलेसियामा काम गरेर नेपाल फर्किएका युवाले नेपालमा पर्यटन व्यवसाय गरेर सफल भएका धेरै युवा आफूले भेटेको पनि कार्यवाहक राजदूत आजमानले बताउनुभयो ।
