गोरखापत्र समाचारदाता
काठमाडौँ, मङ्सिर २७ गते । मर्स्याङ्दी कोरिडोर २२० केभी प्रसारण लाइन आयोजना अन्तर्गत लमजुङको उदिपुर सबस्टेसनबाट तनहुँको आँबुखैरनीस्थित मार्कीचोकबाट चितवनको भरतपुर महानगरपालिका आँपटारीस्थित नयाँ भरतपुर सबस्टेसनसम्मको प्रसारण लाइन निर्माणले गति लिएको नेपाल विद्युत् प्राधिकरणले जनाएको छ ।
मर्स्याङ्दी, दोर्दी तथा त्रिशूली नदी र ती नदीका सहायक खोलामा निर्माण भएका एवं निर्माणाधीन निजी क्षेत्रका जलविद्युत् आयोजनाले उदिपुर–मार्कीचोक–भरतपुर प्रसारण लाइन खण्डको सब कन्ट्र्याक लिएर निर्माण अगाडि बढाइएका छन् । उक्त खण्ड आगामी जेठभित्र निर्माण सम्पन्न गर्ने गरी काम अगाडि बढाइएको छ ।
उदिपुर–मार्कीचोक–भरतपुर प्रसारण लाइन खण्डको ठेक्का लिएको चिनियाँ कम्पनी पिङ्गाओ ग्रुप अफ कम्पनीले छनोट गरेको सब कन्ट्र्याक्टरबाट समयमै काम सम्पन्न गरी लाइन सञ्चालनमा ल्याउने अवस्था नदेखिएपछि निजी क्षेत्रका जलविद्युत् आयोजनाले आफैँ सब–कन्ट्याक लिएर निर्माण अगाडि बढाएका हुन् । यसमा मस्र्याङ्दी, दोर्दी तथा त्रिशूली नदी र ती नदीहरूका सहायक खोलामा जलविद्युत् निर्माण गरी सञ्चालनमा रहेका सात र निर्माणाधीन सात गरी १४ जलविद्युत् आयोजनाको सहभागिता छ । नेपाल विद्युत् प्राधिकरणका कार्यकारी निर्देशक कुलमान घिसिङले मङ्गलबार तनहुँ र चितवनमा निर्माण भइरहेको प्रसारण लाइनको अनुगमन गरी आगामी जेठभित्र काम सम्पन्न गर्न संस्थाका तर्फबाट आवश्यक सहयोग र सहजीकरण गर्ने बताउनुभयो ।
डिभिजन वन कार्यालय चितवन र तनहुँका प्रमुखसँग टेलिफोन संवाद गर्दै घिसिङले वन क्षेत्रको जग्गा प्रयोग र रुख कटानमा स्वीकृति प्रक्रियामा सहजीकरण गरिदिएर महìवपूर्ण प्रसारण लाइनको निर्माण जतिसक्दो छिटो सम्पन्न गर्न आवश्यक सहयोग गरिदिन अनुरोध गर्नुभयो ।
उदिपुर–मार्कीचोक ४० किलोमिटर प्रसारण लाइन खण्डमा ११६ वटा टावर निर्माण गर्नुपर्ने छ । त्यसमध्ये ९० वटा टावरको जग जग हालिएको छ । मार्कीचोक–भरतपुर २८ किलोमिटर प्रसारण लाइन खण्डमा ८३ वटा टावर निर्माण गर्नुपर्ने छ । यसमध्ये ३८ वटा टावरको जग हालिएको छ । हाल छ ठाउँमा काम भइरहेको छ । टावर पाटर्स, तारलगायतका सम्पूर्ण उपकरण तथा निर्माण सामग्री आपूर्ति भइसकेको छ । निजी क्षेत्रका ऊर्जा उत्पादकको तर्फबाट निर्माणमा खटिनुभएका ऊर्जा उद्यमी मोहन कार्कीले प्रसारण लाइन समयमा नबनेमा राज्यलाई नै ठुलो नोक्सानी हुने देखिएपछि मस्र्याङ्दी र त्रिशूली नदी कोरिडोरका जलविद्युत् प्रवर्धकहरूको अग्रसरता एवं सहमतिमा सबकन्ट्र्याक लिएर निर्माण सुरु गरिएको बताउनुभयो ।
मस्र्याङ्दी र त्यसका सहायक नदीबाट उत्पादन हुने विद्युत् राष्ट्रिय प्रसारण प्रणालीमा प्रवाहका लागि मस्र्याङ्दी कोरिडोर २२० केभी प्रसारण लाइन आयोजना सुरु गरिएको हो । प्रसारण लाइनबाट करिब एक हजार छ सय मेगावाट विद्युत् प्रवाह गर्न सकिने छ ।
