काभा पुरुष भलिबल : हेल्प नेपालको लगातार दोस्रो जित

काठमाडौं, मङ्सिर २३ गते । काभा मेन्स भलिबल क्लब च्याम्पियनसिपमा हेल्प नेपाल स्पोर्टस क्लबले लगातार दोस्रो जित हात पारेको छ।

त्रिपुरेश्वरस्थित राखेपको कभर्डहलमा आइतबार भएको पहिलो खेलमा नेपालकै गण्डकी प्रदेश भलिबल संघलाई ३–१ ले हराउँदै हेल्प नेपालले लगातार दोस्रो जित हात पारेको हो।

पहिलो र दोस्रो लगातार दुई सेट जितेको हेल्प नेपालले तेस्रो सेट गण्डकीलाई सुम्पेको थियो । खेलको चौथो सेटमा पुनरागमन गर्दै हेल्प नेपालले जित निश्चित गरेको हो। हेल्प नेपालले खेल २५–१४, २५-२०,२३-२५, २५–१६ ले जितेको थियो। 

लगातारको दोस्रो जित निकालेको हेल्प नेपालले ५ अंक बनाएको छ। शनिबार भएको खेलमा हेल्प नेपालले भारतको कालिकट हिरोजलाई ३–२ ले हराएको थियो। गण्डकीको भने यो लगातार दोस्रो हार हो।