दोहा, मङ्सिर २३ गते । अमेरिकी राष्ट्रपतिमा डोनाल्ड ट्रम्प निर्वाचित भएपछि गाजामा युद्धविराम र बन्धक आदानप्रदान सम्झौतालाई मजबुत बनाउने उद्देश्यका साथ वार्ता गर्ने समय फेरि भएको कतारका प्रधानमन्त्रीले शनिबार बताउनुभएको छ ।
राजनीतिक संवादका लागि दोहा फोरममा कतारका प्रधानमन्त्री शेख मोहम्मद बिन अब्दुलरहमान बिन जसिम अल थानीले भन्नुभयो, “अमेरिकी निर्वाचनपछि हामीले युद्धविराम वार्ताको आवश्यकता महसुस गरेका छौँ र यो समय फेरि आउँदैछ ।”
कतारी प्रधानमन्त्रीले कार्यकाल सकिँदै गरेको र नयाँ आउन लागेको अमेरिकी प्रशासनको सम्झौताप्रतिको दृष्टिकोणमा ‘केही भिन्नता’ भए पनि ‘युद्ध अन्त्य गर्ने लक्ष्यमा कुनै असहमति देखेका छैनौँ ।”
संयुक्त राज्य अमेरिका र इजिप्टसँग मिलेर कतारले गाजामा युद्धविराम र बन्धक रिहाइका लागि महिनौंदेखिको असफल वार्ताका लागि मध्यस्थता गरेको थियो । वार्ताको उद्देश्य र युद्धरत पक्षबिचको बुझाइमा एकरूपता आउन नसक्दा कतारले तत्कालका लागि मध्यस्थताको औचित्यता सकिएको निश्कर्ष निकाल्दै जिम्मेवारीबाट पछि हटेको थियो ।
गत नोभेम्बरमा दोहाले हमास र इजरायलले ‘इच्छा र गम्भीरता’ देखाएपछि मध्यस्थता पुनः सुरु गर्ने घोषणा गरेको थियो ।
शेख मोहम्मदले भन्नुभयो, “राष्ट्रपति कार्यालय आउनुभन्दा पहिले नै सम्झौता हासिल गर्नका लागि आगामी प्रशासनबाट धेरै प्रोत्साहन प्राप्त भएको छ, यसले विगत दुई हप्तामा वार्तालाई ‘ट्रयाकमा फर्काउने’ कतारी निर्णयलाई बल मिलेको छ ।
“हामी जतिसक्दो चाँडो काम सम्पन्न गर्ने आशा राख्छौं हाम्रो सबै पक्षहरूको सद्भावमा संलग्न हुने इच्छा जारी रहनेछ,” उहाँले भन्नुभयो ।
संयुक्त राज्य अमेरिकाको समर्थनमा सन् २०१२ देखि कतारले हमासका लागि उसको राजनीतिक ब्युरोलाई राख्न दिएको बिषयलाई लिएर कतारले थप दबाब को सामना गर्नुपर्ने सम्भावना रहेको भन्ने भनाइलाई पनि प्रधानमन्त्रीले खण्डन गर्नुभएको छ ।
उक्त कार्यालयलाई ‘विभिन्न पक्षबिच भेला हुने मञ्च’ को संज्ञा दिँदै कतारले प्यालेस्टिनी लडाकूविरुद्ध अन्य समाधान खोज्ने अपेक्षा नगरिएको’ उहाँले बताउनुभयो ।
सन् २०२३ को अक्टोबर ७ मा दक्षिणी इजरायलमा हमासले गरेको आक्रमणका क्रममा लडाकूहरूले २५१ जनालाई अपहरण गरेका थिए, जसमध्ये ९६ जना गाजामै छन् । गाजामा रहेका भनिएकामध्ये पनि ३४ जनाको मृत्यु भएको पुष्टि इजरायली सेनाले गरेको छ ।
अमेरिकाका नवनिर्वाचित राष्ट्रपति डोनाल्ड ट्रम्पले यसै साताको सुरुमा सामाजिक सञ्जालमार्फत आफूले कार्यभार सम्हाल्ने बेलासम्म बन्धक बनाइएकाहरूलाई रिहा नगरे गम्भीर परिणाम भोग्नुपर्ने चेतावनी दिनुभएको थियो । ट्रम्पले इजरायललाई कडा समर्थन गर्ने प्रतिबद्धता व्यक्त गर्नुभएको छ । रासस/एएफपी
