गोरखापत्र अनलाइन
काठमाडौँ, मंसिर १६ गते । सरकारले उखुको समर्थन मूल्य प्रतिक्विन्टल ५८५ रुपियाँ तोकेको छ । आइतबार सञ्चार तथा सूचना प्रविधि मन्त्री एवं सरकारका प्रवक्ता पृथ्वीसुब्बा गुरुङले मन्त्रालयमा पत्रकार सम्मेलन गर्दै मन्त्रीपरिषद्ले गरेका निर्णय सार्वजनिक गर्नुभएको हो ।
मन्त्री गुरुङले मङ्सिर १३ गते बसेको मन्त्रीपरिषद् बैठकले मङ्सिर १७ देखि २० गतेसम्म प्रधानमन्त्री केपी शर्मा ओलीले गर्ने चीन भ्रमण स्वीकृत गरेको बताउनुभयो । उहाँले मङ्सिर १० गते बसेको मन्त्रीपरिषद् बैठकले परराष्ट्रमन्त्री डा. आरजु राणाको चीन भ्रमण स्वीकृत गरेको बताउनुभयो । उहाँले मङ्सिर १० गते बसेको बैठकले नै नेपाल धितोपत्र बोर्डको अध्यक्षमा सन्तोषनारायण श्रेष्ठलाई नियुक्त गरेको छ । लेखामान बोर्डको अध्यक्ष पदमा सुनिरकुमार ढुङ्गेललाई र लेखापरीक्षण बोर्डको अध्यक्ष पदमा जगन्नाथ उपाध्यायालाई नियुक्त गरेको जानकारी दिनुभयो ।
उहाँले पोखरा महानगरपालिकाका प्रमुख धनराज आचार्यको पुस ३ देखि १० गतेसम्मको गणतन्त्र कोरियामा फोहोरमैला व्यवस्थापनसम्बन्धी अध्ययन भ्रमणमा सहभागी हुनका लागि स्वीकृति दिएको बताउनुभयो । उहाँले चालु आर्थिक वर्ष २०८१–८२ को लागि उखुको उत्पादन लागत ढुवानी भाडा र मुनाफासहित गरी कृषकले उत्पादन गरेको उखु न्यूनतम खरिद मूल्य प्रतिक्विन्टल ५८५ निर्धारण गर्ने निर्णय भएको बताउनुभयो ।
उहाँले नेपाल सरकार र गणतन्त्र फिनल्यान्डबिच हुने फिनल्यान्डको सार्वजनिक लगानी सुविधा अन्तर्गत वित्त परिचालन हुने परियोजना खाका स्वीकृत गर्ने सन्दर्भमा अर्थ मन्त्रालयलाई स्वीकृत दिने निर्णय गरेको छ । स्थानीय शासक सहयोगका लागि प्रतिबद्धता प्राप्त भएको रकममा खर्च हुन बाँकी ७९.२३ मिलियन अमेरिकी डलरमध्ये प्राविधिक सहायतातर्फ कुल बजेटको अनुपात नघट्ने गरी परिमार्जित कार्यक्रम स्वीकृत गर्ने र सो सम्बन्धित संयुक्त वित्तीय व्यवस्था अनुमोदन गर्ने निर्णय भएको पनि बताउनुभयो ।
मन्त्री परिषद्का निर्णयहरू
१) नेपाल धितोपत्र बोर्डको अध्यक्ष पदमा सन्तोषनारायण श्रेष्ठलाई नियुक्ति गर्ने निर्णय ।
२) लेखापरीक्षण बोर्डको अध्यक्ष पदमा सुन्दरकुमार ढुङ्गेललाई र लेखा परीक्षणमान बोर्डको अध्यक्षमा जगनाथ उपाध्यायलाई नियुक्ति गर्ने निर्णय भएको छ ।
३) नेपाल सरकार र गणतन्त्र फिनल्यान्डबिच हुने फिनल्यान्डको सार्वजनिक लगानी सुविधा अन्तर्गत वित्त परिचालन हुने परियोजनाहरू खाका स्वीकृत गर्ने सन्दर्भमा अर्थमन्त्रालयलाई स्वीकृत दिने ।
४) स्थानीय शासक सहयोगका लागि प्रतिबद्धता प्राप्त भएको रकममा खर्च हुन बाँकी ७९.२३ मिलियन अमेरिकी डलरमध्ये प्राविधिक सहायतातर्फ कुल बजेटको अनुपात नघट्ने गरी परिमार्जित कार्यक्रम स्वीकृत गर्ने र सो सम्बन्धित संयुक्त वित्तीय व्यवस्था अनुमोदन गर्ने निर्णय भएको छ ।
५) नेपाल आयल निगम लिमिटेडलाई चितवन जिल्लाको राप्ती नगरपालिकामा २१९१६.९ बिघा जग्गा प्राप्ति गर्ने स्वीकृत दिने ।
६) परराष्ट्र मन्त्री डा. आरजु राणाको प्रतिनिधि मण्डललाई मङ्सिर १३ देखि १५ गतेसम्म गणतन्त्रवादी चीनको औपचारिक भ्रमण गर्न स्वीकृत दिने ।
७) पुष्पलाल मध्यपहाडी लोकमार्ग राजमार्ग परियोजनालाई राष्ट्रिय वनको १.०७२ हेक्टर जग्गा प्रयोग गर्न स्वीकृत दिने ।
८) नेपाल विद्युत प्राधिकरणलाई कालिगण्डीदेखि रिडीसम्मको १३२ केभी विद्युत प्रसारणलाई निर्माणको लागि राष्ट्रिय वन क्षेत्रको ६.२१ हेक्टर जमिन प्रयोग गर्न स्वीकृत प्रदान गर्ने ।
९) २०८१ पुस ३ देखि १० गतेसम्म गणतन्त्र कोरियामा फोहोरमैला व्यवस्थापन सम्बन्धी अध्ययन भ्रमणमा सहभागी हुन पोखरा महानगरपालिकाका मेयर धनराज आचार्यलाई भ्रमण स्वीकृत प्रदान गर्ने ।
१०) एसियाली विकास बैङ्कबाट क्याइमेन्ट रेजिलेन्ट ल्याण्ड स्केप एण्ड लिब्ली उड्स परियोजनाको लागि प्रस्ताव गरिएको २२ मिलियन अमेरिकी डलर अनुदान तथा १० मिलियन डलर ऋण सहायता स्वीकृत गर्ने ।
११) एसियाली विकास बैङ्कबाट नवीनतम यान्त्रिक सिँचाइ आयोजना कार्यान्वयनको लागि नेपाल सरकारलाई प्राप्त हुने ११० मिलियन अमेरिकी डलर सहुलियतपूर्ण ऋण र १५ मिलियन अमेरिकी डलर अनुदान सहायता स्वीकृत गर्ने ।
१२) भारतको नयाँ डिल्लीमा आयोजना हुने २९ औँ पार्टनरसिप समिट सहभागी हुन उद्योग तथा आपूर्ति मन्त्री दामोदर भण्डारीलाई स्वीकृत दिने ।
१३) चालु आर्थिक वर्ष २०८१–८२ को लागि उखुको उत्पादन लागत ढुवानी भाडा र मुनाफासहित गरी कृषकले उत्पादन गरेको उखु न्यूनतम खरिद मूल्य प्रतिक्विन्टल ५८५ निर्धारण गर्ने निर्णय भएको छ ।
१४।नेपाल सरकार र इन्टरनेशनल वाटर म्यानेजम्यान्ट इन्चिच्युड आईडब्लुएमआईबीच हुने अण्डर स्ट्याडिङ स्वीकृत गर्ने
१५) नेपाल सरकार र अन्तर्राष्ट्रिय रिसर्च सेन्टरबिच हुने समझदारीपत्र स्वीकृति प्रदान गर्ने ।
१६) मङ्सिर १७ देखि २० गतेसम्म प्रधानमन्त्री केपी शर्मा ओलीबाट हुने मित्रराष्ट्र जनवादी गणतन्त्रवादी चीनको औपचारिक भ्रमणमा सहभागी हुने प्रतिनिधि मण्डल गठन गर्ने र भ्रमण स्वीकृत गर्ने ।
१७) गोकर्णेश्वर नगरपालिकामा बन्न लागेको प्रशासकीय भवन निर्माणको लागि सरकारी जग्गा उपयोग गर्न स्वीकृति प्रदान गर्ने ।
१८) उखु किसानलाई अनुदान दिने सम्बन्धी कार्यविधि २०७५ दोस्रो संशोधन २०७६ सहितको दफा ३ (१) बमोजिम चालु आर्थिक वर्ष २०८१–८२ का लागि अनुदान रकम प्रतिक्विन्टल ७० कायम गर्ने निर्णय भएको छ ।
