हजुरआमाको हत्या आरोपमा नाती पक्राउ

शेरबहादुर राई 

ओखलढुङ्गा, मङ्सिर १० गते । ओखलढुङ्गामा ८२ बर्षीय हजुरआमाको हत्या गरेको आरोपमा १३ बर्षीय नाती पक्राउ परेका छन् । हजुरआमाले गाली गरेको निहुमा सहन नसकी आगो फुक्ने ढुंग्रीले प्रहार गरी हत्या गरेको आरोपमा जिल्लाको खिजीदेम्बा गाउँपालिकाका किशोरलाई प्रहरीले पक्राउ गरेको हो । 

मंसिर ६ गते खिजीदेम्वा गाउँपालिका –६ बस्ने वर्ष ८२ कि ठगमायाँ सुनुवार आफ्नै भान्सा कोठामा मृत फेला पर्नुभएको थियो । घटना शंकास्पद देखिएपछि प्रहरीले अनुसन्धान सुरु गरेको थियो । वृद्धा हत्या आरोपमा अनुसन्धानकै क्रममा नाताले नाती पर्ने १३ बर्षीय किशोरलाई पक्राउ गरिएको जिल्ला प्रहरी कार्यालय ओखलढुङ्गाका प्रमुख एवम प्रहरी नायब उपरीक्षक कृष्ण खड्काले बताउनुयो । 

प्रारम्भिक अनुसन्धानका क्रममा ती किशोरले हजुरआमाको गाली सहन नसकी आवेशमा आएर हत्या गरेको स्वीकार गरेका छन् । उनीविरुद्ध कर्तव्य ज्यान सम्बन्धी मुद्दा कसुरमा सोमबार अदालतबाट म्याद थपगरी अनुसन्धान कार्य भइरहको जिल्ला प्रहरी कार्यालय ओखलढुङ्गाले जनाएको छ ।