गोरखापत्र समाचारदाता
काठमाडौँ कात्तिक ११ गते । लिटिल एन्जल्स स्कुलका प्रधानाध्यापक तथा गीतकार मुकुन्दराज शर्माको निबन्धकृति ‘धोबीघाट मेलोडी’ शनिबार सार्वजनिक गरिएको छ । निबन्धकार शर्माले ३० वर्षको शिक्षण यात्राका क्रममा २० हजारभन्दा बढी विद्यार्थीसँगको सङ्गत, सहकार्य र सिकाइका रोचक भावना समेटिएको छ ।
कवि एसपी कोइराला, पूर्वमन्त्री उमेश श्रेष्ठ, ललितपुर महानगरपालिकाका प्रमुख चिरीबाबु महर्जन, प्राडा दयाराम श्रेष्ठ, विष्णुविभु घिमिरे, अशेष मल्ल, श्रीओम श्रेष्ठ रोदन, शकुन्तला शर्मा, कुमारी लामा, निर्मला शर्मा, विद्या लिम्बू, विनी श्रेष्ठ र मान्यता शर्माले संयुक्त रूपमा पुस्तक विमोचन गर्नुभएको हो ।
कार्यक्रममा पूर्वराज्यमन्त्री उमेश श्रेष्ठले गीतकारका रूपमा स्थापित शर्माले निबन्धसङ्ग्रह प्रकाशन गर्दा आफूलाई अत्यन्तै खुसी लागेको बताउनुभयो ।
