काठमाडौँ, कार्तिक ६ गते । नेपाल प्रिमियर लिग (एनपीएल) मा सहभागी क्रिकेट फ्रेन्चाइज क्लब लुम्बिनी लायन्सले युवा तथा प्रतिभाशाली क्रिकेटरका लागि सुनौलो अवसर ल्याएको छ ।
घरेलु प्रतिभालाई प्रोत्साहन गर्ने आफ्नो प्रतिबद्धता अनुरूप लुम्बिनी लायन्सले आगामी एनपीएलको लागि आफ्नो टोलीमा चार उदीयमान खेलाडीलाई सामेल गराउन लागेको हो । यसरी छनोट भएका चार खेलाडी मध्ये एक जनाले ‘सुपरस्टार’ को उपाधि प्राप्त गर्नेछन् ।
जसले नेपाल प्रिमियर लिगका अरू नामुद खेलाडीसँग खेल्न पाउनुका साथै एक लाख रुपियाँ प्राप्त गर्नेछन् । त्यसैगरी बाँकी तीन खेलाडीले ‘स्टार’ को उपाधि प्राप्त गर्नेछन् । जसले लायन्स क्लबको विशेष प्रशिक्षणमा सहभागी हुने अमूल्य अनुभव प्राप्त गर्नेछन् ।
विज्ञ प्रशिक्षकको मार्गदर्शन र निरीक्षणमा युवा क्रिकेटरहरूको सीप निखार्दै उनीहरूलाई प्रोफेसनल क्रिकेट क्लबको हिस्सा बन्ने अवसर प्रदान गर्न यस ट्यालेन्ट हन्टको सुरुवात गरिएको क्लबले जनाएको छ ।
