काठमाडौँ, कात्तिक ४ गते । भारतको लाइफ केयर क्रिकेट क्लबले रुपन्देहीको भैरहवामा जारी बिपी कोइराला स्मृति कप टी–२० क्रिकेट प्रतियोगितामा दोस्रो जित निकालेको छ ।
आइतबार भएको खेलमा लाइफ केयरले नेक्सस रुपन्देहीले दिएको एक सय ३४ रनको लक्ष्य तीन विकेटको क्षतिमा ३.३ ओभर बाँकी छँदै भेट्टाएको थियो । यसअघि टस हारेर ब्याटिङ गरेको नेक्सस रुपन्देहीले २० ओभरमा ६ विकेटको क्षतिमा एक सय ३३ रन बनाएको थियो ।
आइतबार नै भएको अर्को खेलमा बङ्गलादेशको साइक क्रिकेटर्सले पाकिस्तानको जावेद गोहर इन्टरनेसनल क्रिकेट एकेडेमीलाई ४२ रनले हरायो । पाकिस्तानी टिमको यो लगातार दोस्रो हार हो ।
साइक क्रिकेटर्सले दिएको एक सय ४८ रनको लक्ष्य पछ्याएको जावेद गोहर १८.२ ओभरमा सबै विकेटको क्षतिमा एक सय पाँच रनमा समेटिएको थियो ।
यसअघि टस हारेर पहिलो ब्याटिङको निम्तो पाएको साइक क्रिकेटर्सले १९.५ ओभरमा सबै विकेटको क्षतिमा एक सय ४७ रन बनाएको थियो ।
