मोटरसाइकल दुर्घटनामा एकको मृत्यु, एक गम्भीर घाइते

रेखीराम राना

तानसेन, असोज २३ गते । टिपरलाई ओभरटेक गर्ने क्रममा मोटरसाइकल दुर्घटनामा परी एक जनाको मृत्यु भएको छ । मृत्यु हुनेमा रामपुर नगरपालिका–१, हाँगेपीपलका २२ वर्षीय नारायण उचई ठकुरी रहनुभएको छ ।

सोही स्थानका मोटरसाइकल चालक प्रविन उचई गम्भीर घाइते हुनुभएको छ । लु ३१ प ६५०७ नम्बरको मोटरसाइकल मङ्गरबार साँझ ७ बजेतिर सिद्धार्थ राजमार्ग हुँदै बुटवलबाट पाल्पातर्फ आउने क्रममा तानसेन–८, डुम्रेमा लु २ ख ४६३१ नम्बरको टिपरलाई ओभरटेक गर्ने क्रममा दुर्घटना भएको थियो ।

दुर्घटनामा परी गम्भीर घाइते नारायणको उपचारको क्रममा भैरहवा मेडिकल कलेजमा बुधबार बिहान मृत्यु भएको प्रहरीले जनाएको छ । दुर्घटनाबारे थप अनुसन्धान भइरहेको जिल्ला प्रहरी कार्यालय पाल्पाका प्रहरी निरीक्षक सन्दीप बेल्बासेले जानकारी दिनुभयो ।