सिराज खान
नेपालगन्ज, असोज ३ गते। दुई दिन आयोजना गरिने चौथो नेपालगन्ज फोटो फेस्टिबल अन्तर्गत फोटो प्रतिस्पर्धाका लागि फोटो आवेदन खुला गरिएको छ। फोटो पठाउने अन्तिम मिति यही असोज १७ गते सम्म रहेको छ।
अन्तरालको आयोजना तथा व्यवस्थापनमा हरेक वर्ष आयोजना गरिने यो फोटो फेस्टिबलको प्रतिस्पर्धामा देशैभरबाट फोटो पठाउन सकिने आयोजकले जनाएको छ।
अन्तरालका प्रमुख कार्यकारी जयनारायण शाहले नौ वटा विधामा फोटो प्रतिस्पर्धा हुने जनाउँदै हरेक विधाबाट एउटा उत्कृष्ट फोटोलाई पुरस्कृत गरिने र प्रतियोगी सबै फोटो मध्ये सर्वोत्कृष्ट फोटोलाई वर्ष फोटो उपाधिबाट पुरस्कृत गरिने बताउनुभयो।
उहाँले वरिष्ठ फोटो पत्रकार तथा फोटो पत्रकार क्लब पिजे क्लबका पूर्व अध्यक्ष विकास कार्कीको नेतृत्वमा वरिष्ठ फोटोग्राफर रमेश मल्ल सदस्य रहेको निर्णायक टिमले फोटोको अन्तिम छनौट गर्ने जानकारी दिनुभयो।
प्रमुख कार्यकारी शाहका अनुसार फोटो प्रतिस्पर्धामा रहेका विधाहरू समाचार, दैनिक जीवन, पर्यटन, वन्यजन्तु, खेलकुद, संस्कृति, प्रकृति र संरक्षण, कृषि, खुसी र उत्साह झल्किने फोटोहरू नेपाल स्वमाइल रहेका छन्। हरेक विधामा १ जना व्यक्तिले २ वटा सम्म फोटो पठाउन सक्नेछन्।
