सप्तरीमा सवारी दुर्घटनामा एकको मृत्यु, एक घाइते

देवरामप्रसाद यादव
सप्तरी, भदौ ८ गते । सप्तरीको हनुमान नगर कंकालिनी नगरपालिका–५ स्थित कोशी बाँधको सडकमा शनिबार मोटरसाइकल दुर्घटनामा एक जनाको मृत्यु भएको छ भने अर्का एकजना घाइते भएका छन् । यसरी दुर्घटनामा परी मृत्यु हुनेमा राजविराज नगरपालिका–१५ का ५२ वर्षीय विनोदकुमार साहको रहेको हो ।

कोशी बाँधको सडकमा दुई मोटरसाइकल एक आपसमा ठोक्किँदा एक जनाको मृत्यु भएको जिल्ला प्रहरी कार्यालय सप्तरीले जनाएको छ ।

भारदहबाट हनुमान नगरतर्फ आउँदै गरेको स २ प ७२९६ नम्बरको मोटरसाइकल र विपरीत दिशाबाट गइरहेको को ३४ प ५४५९ नम्बरको मोटरसाइकल हनुमान नगर कंकालिनी नगरपालिका–५ स्थित कोसी बाँधमा एक आपसमा ठोक्किएको थियो । दुर्घटनामा स २ प ७२९६ नम्बरको मोटरसाइकल चालक साहको घटनास्थलमै मृत्यु  भएको जिल्ला प्रहरी कार्यालय सप्तरीका सूचना अधिकारी प्रहरी नायब उपरीक्षक ढुण्डिराज नेउपानेले जानकारी दिनुभयो  ।

घाइते अवस्थामा रहेको मोटरसाइकल चालकको पहिचान नखुलेको उनी सिटी रिक्सामा भारदहतर्फ गएकोले खोजी कार्य भइरहेको जिल्ला प्रहरी कार्यालय सप्तरीले जनाएका छन् ।