लीलाराज खड्का
विर्तामोड, भदौ ५ गते । झापाको अर्जुनधारा नगरपालिका–४ दहिझोडाबाट कटुवा पेस्तोलसहित एक जना पक्राउ परेका छन् ।
प्रहरीले स्थानीय ६२ वर्षीय इन्द्रबहादुर आङ्देम्बेलाई मङ्गलबार राती कटुवा पेस्तोलसहित नियन्त्रणमा लिएको हो ।
घरमा अवैध रुपमा हातहतियार लुकाईछिपाई राखेको भन्ने गोप्य सूचनाको आधारमा इलाका प्रहरी कार्यालय अनारमनी विर्तामोडबाट खटिएको प्रहरी टोलीले आङ्देम्बेलाई घरबाट पेस्तोसहित नियन्त्रणमा लिएको हो ।
पक्राउ परेका आङ्देम्बेलाई इलाका इलाका प्रहरी कार्यालय अनारमनीमा राखेर थप अनुसन्धान कार्य भइरहेको जिल्ला प्रहरी कार्यालय झापाले जनाएको छ । पछिल्लो समय झापामा साना हतियार समस्याका रुपमा देखा परेको छ । खुल्ला सिमाको फाइदा उठाउदै सहजै रुपमा झापामा हतियार उपलब्ध भएसँगै यसलाई नियन्त्रण गर्न प्रहरीलाई मुख्य समस्याका रुपमा देखिएको छ ।
