स्टकहोम (स्विडेन), साउन १९ गते । स्विडेनले लेबनानको बेरुतस्थित आफ्नो दूतावास बन्द गरेको शनिबार जनाएको छ । हजारौँ नागरिकलाई लेबनान छोड्न आग्रहसहित गाजामा युद्ध बढ्न सक्ने सम्भावना पछि दूतावास बन्द गर्ने निर्णय गरेको जनाइएको छ ।
यस हप्ता भएको हमास र हेजबुल्लाह नेताहरूको हत्याले गाजा युद्धको बिचमा थप क्षेत्रीय तनाव बढाएको छ ।
स्विडेनको विदेश मन्त्रालयले आफ्ना कर्मचारीलाई बेरुत छोडेर साइप्रस जान निर्देशन दिँदै दूतावास अस्थायी रूपमा स्थानान्तरण गर्ने योजना बनाइरहेको विदेश मन्त्री टोबियास बिलस्ट्रोमले बताउनुभयो ।
उक्त निर्णय सुरुआती चरणमा अगस्ट महिनाको लागि लिइएको जनाउँदै उहाँले सुरक्षा अवस्थाका आधारमा विस्तार गर्न सकिने उल्लेख गर्नुभएको छ ।
विदेश मन्त्रालयका अनुसार सन् २०२३ अक्टोबरदेखि जारी गरिएको चेतावनी बाबजुद दश हजार स्विडेनका नागरिक लेबनान गएका हुनसक्ने उल्लेख गर्दै विदेश मन्त्री बिलस्ट्रोमले लेबनानमा रहेका स्विडेनका नागरिकलाई सो देश छोडी अन्यत्र जान आग्रह गर्नुभएको छ । रासस/एएफपी
