काठमाडौँ, साउन १६ गते । क्यानडामा जारी ग्लोबल टी–२० क्रिकेट लिगमा नेपालका कप्तान रोहितकुमार पौडेल आबद्ध टोरोन्टो नेसनल्सले अर्को हार खेपेको छ । मङ्गलबार राति भएको खेलमा टोरोन्टो नेसनल्स बंग्ला टाइगर्ससँग दुई रनले पराजित भयो । टोरोन्टो नेसनल्सको यो लगातार दोस्रो हार हो ।
जितका लागि टाईगर्सले दिएको एक सय ६९ रनको लक्ष्य पछ्याएको टोरोन्टो नेसनल्सले निर्धारित २० ओभरमा सात विकेटको क्षतिमा एक सय ६६ रन मात्र बनाएको थियो । टोरोन्टो नेसनल्सका लागि निकोलस किर्तनले सर्वाधिक ७४ रन बनाउनुभयो । यस्तै रोमारियो शेफर्डले अविजित २४ तथा कप्तान कोलिन मुनरो र रोस्टन चेसले १७/१७ रन बनाउनुभयो ।
बलिङमा बंग्लाका अलि खानले दुई तथा डिबिड विजे, सरिफुल स्लाम, साकिब अल हसन र इफ्तिखार अहमदले एक एक विकेट लिनुभयो । यसअघि टस हारेर पहिले ब्याटिङ गरेको बंग्लाले निर्धारित २० ओभरमा सात विकेटको क्षतिमा एक सय ६८ रन बनाएको थियो ।
बंग्लाका लागि लागि डेबिड विजेले अविजित सर्वाधिक ३८ रन बनाउनुभयो । यस्तै मोहम्मद वासिमले २७, कप्तान साकिब अल हसन र ओपनर रहमानउल्लाह गुर्बाजले २४/२४ रन जोड्नुभयो । बलिङमा टोरोन्टो नेसनल्सका रोमारियो शेफर्ड र साद विन जाफरले दुई दुई तथा मोहम्मद नवाज, मोहम्मद रोहिद र जुनैद सिद्धिकीले एक एक विकेट झार्नुभयो ।
