बजेट संशोधनको माग गर्दै जसपा नेपालद्वारा मधेश प्रदेश सभा बैठक अवरुद्ध

जनकपुर, असार २३ गते । आगामी आर्थिक वर्षको बजेट संशोधनको माग गर्दै जनता समाजवादी पार्टी (जसपा) नेपालले मधेश प्रदेश सभा बैठक अवरुद्ध गरेको छ । आजको बैठकमा बजेटबारे छलफल गर्ने कार्यसूची रहे पनि बैठक सुरु हुनासाथ जसपा नेपालका तर्फबाट प्रदेश सभा सदस्य राजुप्रसाद गुप्ताले असार १६ गते मुख्यमन्त्रीलाई बुझाइएका तीन बुँदे मागका बारेमा सरकारको आधिकारिक धारणा माग गर्नुभयो । 

उहाँले बजेट संशोधनका लागि ध्यानाकर्षण पत्र बुझाउँदासमेत अहिलेसम्म सम्बोधन नभएकाले बैठक चल्न नदिने बताउनुभयो । सभामुख रामचन्द्र मण्डलले गत शुक्रबारको बैठक अवरुद्धपछि विनियोजन विधेयक-२०८१ संशोधन गर्ने सहमति भइसकेकाले बैठक सञ्चालनमा सहयोग गर्न आग्रह गर्नुभएको थियो । 

सांसद गुप्ताले बजेट संशोधनबारे छलफलपछि मात्रै बजेटबारे थप प्रक्रिया अगाडि बढ्ने बताएपछि जसपाका सबै सांसदहरूले उठेर अवरोध जारी राखे । त्यसपछि सभामुख मण्डलले १० मिनेटका लागि बैठक स्थगित गर्नुभयो । पौने एक बजे स्थगित भएको बैठक अहिलेसम्म पुनः सुरु हुनसकेको छैन । रासस