चन्द्र पन्दाक
ताप्लेजुङ, जेठ ४ गते। ताप्लेजुङको फुङ्लिङ नगरपालिकामा जारी चौथो मेयर कप पुरुष भलिबल प्रतियोगितामा शुक्रबार चार खेल सम्पन्न भएका छन्। बिहीबारदेखि सुरु भएको अन्तरपालिकास्तरीय भलिबल प्रतियोगितामा चार खेल सम्पन्न भएका हुन्।
प्रतियोगिताको दोस्रो दिन शुक्रबार भएको पहिलो खेल सिदिङ्वा गाउँपालिकाले मेरिङ्देन गाउँपालिकालाई ३-० को सोझो सेटमा हराउँदै विजयी भएको छ। यस्तै दोस्रो खेल पाथीभरा याङ्वरकले फक्ताङ्लुङ गाउँपालिकालाई ३–० कै सोझो सेटमा पराजित गर्दै विजयी बनेको हो।
तेस्रो खेलमा पनि आयोजक फुङ्लिङ नगरपालिकालाई ३–० को सोझो सेटमा हराउँदै मिक्वाखोला गाउँपालिका विजयी भएको छ। शुक्रबारको अन्तिम खेल भने सिरिजङ्घा गाउँपालिकाले ३–२ को सेटमा फक्ताङ्लुङ गाउँपालिकालाई पराजित गर्दै विजयी बनेको छ।
बिहीबारदेखि सुरु भएको पाँच दिने ताप्लेजुङ पर्यटन महोत्सवको अवसरमा फङ्लिङ नगरपालिकाले प्रतियोगिता आयोजना गरेको हो। मेयर कप भलिबल प्रतियोगिताको विजेताले ट्रफीसहित दुई लाख ७५ हजार १०० रुपियाँ र उपविजेताले एक लाख ४० हजार १०० रुपियाँ राशिको नगद पुरस्कार पाउने छन्।