विजयकुमार साह
ढल्केबर, जेठ ४ गते । धनुषाको विदेह नगरपालिका–७, जोगियारामा स्कुल बसको ठक्करबाट एक जनाको मृत्यु भएको छ । मृत्यु हुनेमा सोही ठाउँका २० वर्षीय सन्तोष यादव रहेको प्रहरीले जनाएको छ ।
प्रहरीका अनुसार शुक्रबार करिब ११ बजे ना ४ ख ५७० नम्बरको स्कुल बस र प्रदेश २–०२–००४ प ३७४२ नम्बरको मोटरसाइकल एकआपसमा ठोक्किएको थियो । ठक्करबाट मोटरसाइकलमा सवार यादवको मृत्यु भएको हो ।
ठक्करबाट गम्भीर घाइते भएका यादवलाई उपचारका लागि प्रादेशिक अस्पताल जनकपुर ल्याउँदा चिकित्सकले मृतक घोषणा गरेको प्रहरीको भनाइ छ । पोष्टमार्टमका लागि यादवको शव सोही अस्पतालमा राखिएको छ ।
विदेह नगरपालिका–६, तिनकौरियामा रहेको लर्ड गणेश बोर्डिङ् स्कुलको बस भएको र घटना सम्बन्धमा थप अनुसन्धान भइरहेको धनुषा प्रहरीले जनाएको छ ।
