सातौँ पटक म्याद थप तर ठेकेदार गायब
रुकुमपश्चिममा पाँच वर्ष पहिले निर्माण सुरु गरिएको एउटा सडकखण्डको म्याद सात पटक थप गरिएको छ। साताैँ पटक म्याद थप भए पनि ठेकेदार सम्पर्कविहीन भएका छन्। जिल्लाको मुसीकोट नगरपालिकामा रहेको शीतलपोखरी–झुल्खेत–चुन्वाङ सडकखण्ड निर्माणको जिम्मा लिएको ठेकेदार कम्पनी म्याद थप गरेपछि सम्पर्कविहीन भएको हो। ग्रामीण सडक सञ्जाल सुधार आयोजनाअन्तर्गत सञ्चालित उक्त सडकखण्ड निर्माणका लागि पीएच/एसएमएनएस जेभीले जिम्मा लिएको थियो। २०७४ सालमा निर्माण सुरु गरिएको उक्त सडकखण्डको काम ठेकेदार कम्पनीका कारण बेलैमा हुन नसकेको आयोजना कार्यान्वयन एकाइ रुकुमपश्चिमका व्यवस्थापक टङ्कप्रसाद खनालले जानकारी दिनुभयो।
माग गरेकै दिन पीडितलाई राहत रकम
अहिले बिल पेश गरेको दिनमै रकम पाइन थालेको रहेछ, बिल अनुसारको रकम नपाए पनि पाउने रकम सहजै पाउँदा सजिलो भयो ।
तपस्वीलाई खानेपानी समस्या
नाम्खा गाउँपालिका–३ को माथिल्लो झुलामा बस्ने तपस्वीलाई खानेपानीको समस्या भएको छ । पानी अभाव भएपछि स्थानीय युवाहरू तीन घण्टा पैदल हिँडेर खानेपानीको व्यवस्था गर्न बाध्य हुँदै आएको छ ।
कर्णाली राजमार्ग मर्मत नहुँदा यात्रुलाई सास्ती
गत असोजमा आएको बाढी पहिरोले भत्किएर क्षतविक्षत भएको कर्णाली राजमार्ग समयमै मर्मत नहुँदा यात्रुहरूलाई सास्ती भएको छ ।
कालिकोटका महिलाहरूलाई जीविकोपार्जन तालिम
कालिकोटको तिलागुफा नगरपालिकाले नगरवासीलाई आत्मनिर्भर गराउन विभिन्न सिपमूलक तालिम दिन सुरु गरेको छ ।
बाह्र वर्षपछि घण्टाघरमा नयाँ घडी
सुर्खेतको वीरेन्द्रनगरमा रहेको घण्टाघरमा १२ वर्षपछि पुराना घडी हटाएर नयाँ घडी जडान गर्न लागिएको छ । १२ वर्षदेखि बन्द घण्टाघरका घडी सञ्चालनमा ल्याउन नसकिएपछि सुर्खेत उद्योग वाणिज्य सङ्घको पहलमा वीरेन्द्रनगर नगरपालिकाले १२ लाख रुपियाँको लागतमा नयाँ घडी जडान गर्न लागेको हो । घण्टाघरको संरक्षणको जिम्मा वीरेन्द्रनगर नगरपालिकाको भए पनि पुराना घडीहरू मर्मतसम्भार हुन नसकेपछि विदेशबाट नयाँ घडी मगाएर जडान कार्य सुरु भएको छ । नयाँ घडी जडान गर्न प्राविधिक टोलीले घण्टाघरका पुराना घडीलाई विस्थापित गरी नयाँ जडानको तयारी सुरु गरिसकेको वीरेन्द्रनगर नगरपालिकाका प्रमुख प्रशासकीय अधिकृत नरहरि तिवारीले जानकारी दिनुभयो ।
सडक बनाउँदा झोलुुङ्गे पुलमा क्षति
खार्पुनाथ गाउँपालिका–१, लालीबगर क्षेत्रको लोचाकुनामा बनाइएको झोलुङ्गे पुलमा क्षति पुगेको छ । कर्णाली कोरिडोरको हुम्ला खण्डमा पर्ने बोक्चे गौँडादेखि लालीबगर खण्डको सडक निर्माणका क्रममा कर्णाली नदीमाथिको झोलुङ्गे पुलमा क्षति पुगेको हो ।
दरबारलाई सङ्ग्रहालय बनाइँदै
जाजरकोट दरबारलाई सङ्ग्रहालय बनाउने तयारी गरिएको छ । नेपाल सरकारले चार वर्षअघि बनाएको नेपालका एक सय पर्यटकीय गन्तव्यको सूचीमा परेको एक सय वर्षभन्दा पुरानो यस दरबारलाई सङ्ग्रहालय बनाउन लागिएको हो । यसका लागि सम्पदा संरक्षण प्रतिष्ठानले ऐतिहासिक, पुरातात्त्विक सामग्री दान गर्न जाजरकोटवासीलाई आग्रह गरेको छ ।
बाटोमै टुट्यो अमेरिकाको सपना
‘अवैध’ बाटो हुँदै ‘सपनाको देश’ अमेरिका जाने क्रममा रुकुमपश्चिमको आठबिसकोट नगरपालिका–१०, का २० वर्षीय मदन शाही पानामाको जङ्गलमा मृत अवस्थामा भेटिएको खबर घरमा आइपुगेको छ। छोरो अमेरिका पुगेको खबर कहिले आउला भन्दै कुरेर बस्नुभएकी पुतली शाही छोरो नै नरहेको खबर सुनेर मर्माहत हुनुभएको छ। मदनले घर छोडेको वर्ष दिन पुग्नै लाग्दा आइपुगेको दुखद खबरले परिवार र आफन्तलाई विक्षिप्त बनाएको छ।
तिला नदीमा बालक बेपत्ता
तिला नदीमा एक बालक बेपता भएका छन् । जिल्लाको तिलागुफा नगरपालिका १ को भिग्म बजारस्थित तिला नदी किनारमा खेलिरहेका १३ वर्षीय बालक बेपत्ता भएका हुन् ।
‘कर्णालीको विकास र समृद्धिका लागि एक हौँ’
कर्णाली प्रदेश सभाको दोस्रो कार्यकालको प्रथम अधिवेशन सोमबारदेखि सुरु भएको छ । प्रथम अधिवेशनको पहिलो दिन प्रदेश सभामा प्रतिनिधित्व गर्ने दल तथा प्रदेश सभा सदस्यहरूले आफ्नो धारणा राखेका छन् ।
हिमाली जिल्लामा आवासीय विद्यालय आवश्यक
कर्णालीका हिमाली जिल्लामा मङ्सिरदेखि हिमपात तथा चिसोका कारण पठनपाठन प्रभावित हुन्छ। अत्यधिक हिउँ पर्ने, स्थानीय खेतीपातीमा व्यस्त हुनुपर्ने, जडीबुटी सङ्कलन गर्न जाने, विद्यालय जानुपर्ने बालबालिकालाई खर्क पठाउने तथा अभिभावकमा शिक्षाको कमीजस्ता कारण यो अवधिमा बालबालिका विद्यालयदेखि बाहिर हुन्छन्।
कर्णाली प्रदेश सभा प्रथम अधिवेशन आज
कर्णाली प्रदेश सभाको दोस्रो कार्यकालको पहिलो अधिवेशन सोमबार बस्दै छ। निर्वाचन परिणाम सार्वजनिक भएको २० दिनभित्र अधिवेशन आह्वान गरिसक्नुपर्ने संवैधानिक व्यवस्था छ। सोहीअनुसार प्रदेश सरकारको सिफारिसमा प्रदेश प्रमुख तिलक परियारले सोमबार दिउँसो १ बजेका लागि अधिवेशन आह्वान गर्नुभएको छ। प्रदेश सभा सचिवालयले सबै तयारी पूरा भएको जनाएको छ। प्रदेश सभा सचिवालयका सचिव जीवराज बुढाथोकीले अधिवेशनको आवश्यक सबै तयारी पूरा भएको जानकारी दिनुभयो। उहाँले भन्नुभयो, “सिट व्यवस्थापनलगायतका सबै तयारी पूरा गरेका छौँ।”
सुर्खेत प्रहरी प्रमुखमा थापा
जिल्ला प्रहरी कार्यालय सुर्खेतको प्रमुखमा प्रहरी उपरीक्षक (एसपी) को जिम्मेवारीमा योगेन्द्रसिंह थापा आउनुभएको छ । यसअघि सुर्खेत प्रहरी प्रमुख रहेका एसपी पदम विष्टको सरुवा भएपछि राजमार्ग सुरक्षा कार्यालय रुपन्देहीमा कार्यरत थापा प्रहरी प्रमुख बनेर सुर्खेत आउनुभएको हो ।
दैलेखमा पेट्रोलियम अन्वेषण, पूर्वाधारमै ढिलाइ
सडक पूर्वाधार स्तरोन्नति र जग्गा अधिग्रहण गर्न ढिलाइका कारण दैलेखमा रहेको पेट्रोलियम पदार्थको अन्वेषण कार्य ढिलाइ भएको छ। कोरोना महामारीका कारण धकेलिएको पेट्रोलियम पदार्थको अन्वेषण कार्यका लागि सम्झौताको म्याद पुनः थप गरिए पनि सडक पूर्वाधार स्तरोन्नति र जग्गा अधिग्रहण गर्न ढिलाइका कारण काम सुरु हुन नसकेको खानी तथा भू–गर्भ विभागले जानकारी दिएको छ।
सामुदायिक विद्यालय गाभिँदै
शैक्षिक गुणस्तर सुधारका लागि सामुदायिक विद्यालयहरू समायोजन (मर्ज) गरिएका छन्। स्थानीय तहले भौतिक पूर्वाधारको अवस्था तथा जनशक्ति र विद्यार्थी अनुपात हेरेर सामुदायिक विद्यालयहरू गाभेका हुन्। सुर्खेतको सिम्ता गाउँपालिकाले १७ वटा सामुदायिक विद्यालय गाभेर आठवटा कायम गरेको छ। विद्यार्थी–शिक्षकको अनुपात नमिलेका विद्यालयहरू समायोजन गरिएको पालिकाले जनाएको छ।
अवैध घरटहरा हटाइए
पश्चिम सुर्खेतको चौकुने गाउँपालिका–९, सुनाकाँडामा अवैध रूपमा राष्ट्रिय वन क्षेत्र ओगटेर बनाइएका ४९ घरटहरा हटाइएको छ। डिभिजन वन कार्यालय भेरी, इलाका प्रहरी कार्यालय बाबियाचौर र सशस्त्र प्रहरी वन बेसक्याम्प गुटुको संयुक्त टोलीले शुक्रबार ती अवैध घरटहराहरू हटाएको हो। डिभिजन वन कार्यालय भेरीका डिभिजनल वन अधिकृत वसन्तबाबु श्रेष्ठले राष्ट्रिय वन क्षेत्र ओगटेर अवैध घरटहरा बनाइएको भन्ने सूचनाको आधारमा टोलीले गएर हटाएको बताउनुभयो। समथर र सुन्दर स्थान भएकाले त्यहीँ वरपरका बासिन्दाले नै उक्त क्षेत्रमा घरटहरा बनाएको उहाँको भनाइ छ। घरटहरा हटाउँदा बनाउनेहरू त्यहाँ कोही पनि नभएको उहाँले बताउनुभयो।
सात वर्षमा पुलका दुई पिल्लर निर्माण
बाजुराको बूढीगङ्गा नगरपालिकामा रहेको बेलामाण्डौ डेल्टा सडक खण्डको बार्जुगाड नदिमा निर्माणाधीन पुल सात वर्ष बितिसक्दा पनि दुई वटा पिलर मात्र तयार भएको छ । ठेकेदार र नियामक निकायको मिलेमतोमा ढिलासुस्ती हुँदा ४५ मिटर लम्बाइको पक्की पुल निर्माणको काममा ढिलाइ भएको छ ।
विद्यालय पहुँचबाहिर बालबालिका
भेरी नगरपालिकामा ११४ जना बालबालिका विद्यालयको पहुँचबाहिर रहेको पाइएको छ। नागरिक समाजका संयोजक राजेन्द्रविक्रम शाहले नगरपालिकामै बालबालिका विद्यालयबाहिर हुनु, बालविवाहमा वृद्धि हुनु, अभिभावक र सरोकारवाला निकाय गैरजिम्मेवार हुनुको परिणाम भएको बताउनुभयो।
जिल्लाका उत्पादन बेच्ने कोसेली घर बन्द
रुकुमपश्चिमको उत्पादनको बजार प्रवद्र्धन गर्ने उद्देश्यसहित सञ्चालनमा ल्याइएको रुकुमेली कोसेली घर दुई वर्षदेखि बन्द अवस्थामा रहेको छ। नेपाल घरेलु तथा साना उद्योग महासङ्घद्वारा कोसेली घर सञ्चालनमा ल्याइएको थियो। मुसीकोट नगरपालिका–१, शहीद मैदानस्थित कोसेली घर ११ वर्ष पहिले सञ्चालनमा ल्याइएको थियो। सञ्चालक समितिका अध्यक्ष विवेक ओलीका अनुसार आर्थिक सङ्कटका कारण कोसेली घर बन्द अवस्थामा रहेको छ। आर्थिक समस्या र अघिल्लो सञ्चालक समितिले नयाँ कार्यसमितिलाई हिसाबकिताब नबुझाएकाले कोसेली घर बन्द भएको अध्यक्ष ओलीको भनाइ छ। कोसेली घर सञ्चालक समितिका पूर्वसचिव कर्णबहादुर ओलीले घरमा स्थानीय उत्पादन जम्मा गरिएको भए पनि बजारीकरणको समस्याका कारण बन्द भएको बताउनुभयो। स्थानीय सरकारले बजारीकरणमा ध्यान दिएमा सञ्चालनमा कुनै समस्या नहुने उहाँको भनाइ छ।
लेकमा चिसो बढेपछि बेँसी सार्दै भेडीगोठ
मुगुको लेकमा चिसो बढेसँगै चरन अभाव हुन थालेपछि मुर्मागाउँका करिब ३७ घरधुरीले नौ हजार भेडाबाख्रा लिएर बेँसीतिर झरेका छन्। हिउँदयामको मौसममा गाउँमा हिमपातका कारणले घाँस नपाउने भएकाले मुर्मागाउँका भेडाबाख्रा पालक किसानले भेडाबाख्रालाई चरनका लागि बेँसीतिर झारेका हुन्। छायाँनाथ रारा नगरपालिका–९ को मुर्मागाउँदेखि तल्लो मुर्मागाउँको जेउड्यासम्म झन्डै एक दर्जन बढीले पुख्र्यौली व्यवसायका रूपमा भेडाबाख्रापालन गर्दै आएका छन्। मुर्मागाउँका बाख्रापालक कृषक खुमबहादुर रोकायाका अनुसार गाउँमा हिउँदको समयमा भेडाबाख्रालाई चरन नभएको, हिउँदमा जोखिम र चरन क्षेत्रमा हिउँ जम्दा अत्यधिक चिसोबाट बचाउन भेडाबाख्रालाई बेँसी झारिएको हो।
कर्णाली नेतृत्वमा दुवैको दाबी
राष्ट्रिय राजनीतिमा फेरबदल आएसँगै त्यसको असर कर्णाली प्रदेशमा पनि परेको छ। जसले गर्दा नेपाली कांग्रेसले अब कर्णालीमा सरकार बनाउने हैसियत गुमाएको छ। कर्णालीमा नेकपा (एमाले) र नेकपा (माओवादी केन्द्र)को गठबन्धन सरकार बन्ने अवस्था छ। योसँगै कर्णालीमा नेकपा (एमाले) कि नेकपा (माओवादी केन्द्र)ले नेतृत्व गर्ने भन्ने विषय चर्चा र बहसको विषय बनेको छ।
दुई महिनापछि सडक सञ्चालन
गमगढी–बालै सडक झन्डै दुई महिनापछि सञ्चालनमा आएको छ। असोजको तेस्रो साता परेको वर्षासँगै विभिन्न ठाउँमा पहिरो खसेपछि सडक अवरुद्ध भएको थियो। छायानाथ रारा नगरपालिकाको पहलमा सडकमा खसेको पहिरो र ढुङ्गा पन्छाएपछि सडक सञ्चालनमा आएको हो। लामो समयसम्म सडक बन्द हुँदा छायानाथ रारा नगरपालिकाका स्थानीयवासीलाई दैनिक उपभोग्य वस्तु ढुवानी गर्न र विद्यालय आउजाउमा विद्यार्थीलाई कठिनाइ भएको थियो। छायानाथ रारा नगरपालिका–१ की रामछिता नेपालीले सडक सञ्चालनपछि स्थानीयवासीलाई सुविधा पुगेको बताउनुभयो।
पूर्वसूचना प्रणाली जडान
पश्चिम सुर्खेतको भेरी नदी किनारका दुई पालिकाका करिब चौबीस सय घरधुरी पूर्वसूचना प्रणाली जडान गरिएको छ। वराहताल गाउँपालिका र पञ्चपुरी नगरपालिकाका दुई हजार ३८८ घरधुरीले भेरी पूर्वसूचना प्रणालीबाट लाभान्वित हुने अपेक्षा गरिएको छ। सुन्दर नेपाल संस्थाले सो प्रणाली जडान गरेको हो। एक वर्षे अवधिको सो परियोजनाको समापनसहित उक्त प्रणाली सम्बन्धित पालिकालाई हस्तान्तरण गरिएको हो।
कर्णाली प्रदेश सभाको प्रथम अधिवेशन आह्वान
कर्णाली प्रदेशसभाको दोस्रो कार्यकालको प्रथम अधिवेशन आह्वान भएको छ । मुख्यमन्त्री जीवनबहादुर शाहीको अध्यक्षतामा बसेको मन्त्रिपरिषद् बैठकको सिफारिसमा प्रदेश प्रमुख तिलक परियारले पुस १८ गते अधिवेशन आह्वान गर्नुभएको हो ।
