बाजुरामा भोलि मतदान हुने, दोलखा र स्याङ्जा घटनाको अनुसन्धान हुँदै
मङ्सिर ४ गते सम्पन्न भएको आमनिर्वाचनमा विवाद भएका क्षेत्रमा अनुसन्धान भइरहेको निर्वाचन आयोगले जनाएको छ ।
५१ क्षेत्रको मत परिणाम आउन बाँकी
प्रतिनिधि सभाका तर्फ १६५ निर्वाचन क्षेत्रमध्ये ११४ वटा निर्वाचन क्षेत्रको मत परिणाम सार्वजनिक भएको छ । मतदान सम्पन्न भएको पाँच दिन पछि शुक्रवार बिहानसम्ममा ५१ क्षेत्रको मतगणना अझै जारी रहेको निर्वाचन आयोगले जनाएको छ ।
रुकुम पश्चिमबाट अर्थमन्त्री शर्मा चौथो पटक विजयी
अर्थमन्त्री जनार्दन शर्मा रुकुम पश्चिमबाट प्रतिनिधि सभा सदस्यमा विजयी हुनुभएको छ । बाम–लोकतान्त्रिक गठबन्धनका तर्फबाट उम्मेदवार हुनुभएका नेकपा माओवादी केन्द्रका उपमहासचिव शर्मा रुकुम पश्चिमबाट चौथो पटक निर्वाचित हुनुभएको हो ।
रुपन्देही २ (ख) मा एमाले नेता श्रेष्ठ निर्वाचित
रूपन्देही निर्वाचन क्षेत्र नम्बर २ (ख) बाट नेकपा (एमाले) का भोजप्रसाद श्रेष्ठ प्रदेशसभा सदस्यमा विजयी हुनुभएको छ। उहाँले १६ हजार ३ सय मत प्राप्त गरी विजयी हुनुभएको हो ।
फराकिलो मतान्तरले कांग्रेस उपसभापति खड्का विजयी
सुर्खेत क्षेत्र नम्बर १ बाट प्रतिनिधिसभा सदस्यमा नेपाली कांग्रेसका उपसभापति पूर्णबहादुर खड्का विजयी हुनुभएको छ। उहाँ ११ हजार ६१९ मतान्तरले खड्का विजयी हुनुभएको हो।
पूर्वी नवलपरासी २ मा कांग्रेसका विष्णुकुमार कार्की विजयी
पूर्वी नवलपरासी क्षेत्र नम्बर २ बाट नेपाली कांग्रेसका विष्णुकुमार कार्की विजयी हुनुभएको छ।
सुर्खेत १ प्रदेशसभा (ख) मा माओवादीका कृष्ण जिसी निर्वाचित
सुर्खेत क्षेत्र नम्बर १ को (ख) मा सत्ता गठबन्धनका तर्फबाट नेकपा (माओवादी केन्द्र)का कृष्ण जिसी निर्वाचित हुनुभएको छ । उहाँले एमालेका डण्डीप्रसाद शर्मालाई चार हजार १९६ मतान्तरले पराजित गर्दै निर्वाचित हुनुभएको हो।
खोटाङबाट माओवादी केन्द्रका रामकुमार राई विजयी
खोटाङ, मङ्सिर ८ गते । खोटाङबाट प्रतिनिधि सभा सदस्यमा नेकपा (माओवादी केन्द्र) का रामकुमार राई विजयी हुनुभएको छ । नेकपा (एमाले) का विशाल भट्टराईलाई दुई हजार ६६९ मतान्तरले पराजित गर्दै राई विजयी हुनुभएको हो । खोटाङमा खसेको ६७ हजार तीन सय ७३ मतमध्ये राईले ३१ हजार तीन सय ५१ मत प्राप्त गर्नुभएको छ । उहाँका निकटतम प्रतिद्वन्द्वी भट्टराईले २८ हजार ६८२ मत प्राप्त गर्नुभएको छ।
काभ्रे २ प्रदेशसभा (क) मा समाजवादीका लक्ष्मण लम्साल विजयी
काभ्रेपलाञ्चोक जिल्लाको निर्वाचन क्षेत्र नम्म्बर २ को प्रदेशसभा (क) मा नेकपा (एकीकृत समाजवादी)का लक्ष्मण लम्साल विजयी हुनुभएको छ।
रौतहट २ को प्रदेशसभा (क) मा एमालेका आलम विजयी
रौतहट क्षेत्र नम्बर २ को प्रदेशसभा (क) बाट नेकपा (एमाले)का मोहम्मद जैद आलम विजयी हुनुभएको छ। आलमले १३ हजार ५३२ मत ल्याउनुभएको छ।
गुल्मी-१ मा भण्डारी र ज्ञवालीको कडा प्रतिस्पर्धा
गुल्मी क्षेत्र नम्बर १ मा नेकपा (एमाले)का प्रदीप ज्ञवाली र नेपाली कांग्रेसका डा.चन्द्र भण्डारीबीच कडा प्रतिस्पर्धा देखिएको छ । कांग्रेसका भण्डारीले सुरुवाती अग्रता लिनुभएको थियो । अहिले एमालेका ज्ञवालीले ४९३ मतसहित विजयी हुनुभएको छ ।
सुर्खेत २ (ख) मा माओवादीका विष्ट विजयी
सुर्खेत निर्वाचन क्षेत्र नम्बर २ प्रदेश सभा (ख) मा नेकपा (माओवादी केन्द्र) का विन्दमान विष्ट विजयी हुनुभएको छ । उहाँले नेकपा (एमाले)का ताराकेशर गौतमलाई ४ हजार ५७५ मतान्तरले पराजित गर्नुभएको हो ।
सत्ताको मोलमोलाइ अब सुरु हुन्छ : अध्यक्ष ओली
नेकपा (एमाले) का अध्यक्ष एवम् पूर्व प्रधानमन्त्री केपी शर्मा ओलीले निर्वाचन परिणामले मुलुकमा स्थिरता कायम नहुने र सत्ताको लागि मोलमोलाइ सुरु हुने बताउनुभएको छ । निर्वाचन परिणामको ट्रेन्डले मुलुकमा राजनीतिक स्थिरता हुने संकेत नदेखिएको उहाँको भनाइ छ ।
खलंगामा गठबन्धनका उम्मेदवारको धन्यवाद सभा
सल्यानमा प्रदेश तथा प्रतिनिधिसभामा सत्ता गठबन्धनका उम्मेदवार विजयी हुनुभएको छ।
झापा-३ मा राप्रपा अध्यक्ष लिङ्देन विजयी
झापाको प्रतिनिधिसभा क्षेत्र नं. ३ मा राष्ट्रिय प्रजातन्त्र पार्टीका अध्यक्ष राजेन्द्र लिङ्देन विजयी हुनुभएको छ ।
रसुवाबाट कांग्रेसका मोहन आचार्य विजयी
रसुवाबाट प्रतिनिधिसभा सदस्यमा नेपाली कांग्रेसका मोहन आचार्य विजयी हुनुभएको छ ।
रौतहट ३ को (ख)मा कांग्रेसका यादव विजयी
रौतहट क्षेत्र नं. ३ को प्रदेशसभा (ख)मा नेपाली कांग्रेसका उम्मेदवार सुनिलकुमार यादव विजयी हुनुभएको छ ।
धनकुटा प्रदेशसभामा एमालेका राई र पराजुली विजयी
धनकुटाको प्रदेशसभामा नेकपा (एमाले) विजयी भएको छ। प्रदेशसभा (क) र (ख) मा एमाले विजयी भएको हो।
गण्डकी प्रदेश : अधिकांश क्षेत्रको मतगणना सकियो
गण्डकी प्रदेशका प्रतिनिधिसभाअन्तर्गत १८ निर्वाचन क्षेत्र र प्रदेशसभाअन्तर्गत ३६ निर्वाचन क्षेत्रमध्ये अधिकांशको नतिजा सार्वजनिक भएको छ ।
धनकुटाबाट एमालेका राजेन्द्रकुमार राई निर्वाचित
धनकुटाबाट प्रतिनिधिसभा सदस्यमा नेकपा (एमाले)का राजेन्द्रकुमार राई निर्वाचित हुनुभएको छ ।
दुर्लभ थापाको विजय जुलुस
भक्तपुर– २ मा नेपाली कांग्रेसका दुर्लभ थापा क्षेत्री विजयी हुनुभएको छ। थापाले २४ हजार २३९ मत प्राप्त गर्नुभएको छ। उहाँको निकटतम प्रतिद्वन्द्वी नेकपा एमालेका महेश बस्नेतले २३ हजार २८२ मत प्राप्त गर्नुभयो ।
डोल्पा प्रदेश (क)मा नेकपा एमालेका उम्मेदवार बुढा विजयी
डोल्पा प्रदेश निर्वाचन क्षेत्र (क) बाट नेकपा एमालेका उम्मेदवार शेरबहादुर बुढा भारी मतले प्रदेश सभासदस्यमा निर्वाचित हनुभएको छ ।
बैतडीमा माओवादीका कुँवरको अग्रता
एक मात्रै प्रतिनिधिसभा निर्वाचन क्षेत्र रहेको बैतडीमा नेकपा (माओवादी केन्द्रका) का उम्मेदवार नरेन्द्र कुँवर (विजयसुन्दर) ले अग्रता लिनुभएको छ ।
बाँके-१ मा एमालेको अग्रता
बाँके क्षेत्र नम्बर १ को मतगणना अन्तिम चरणमा पुग्दा एमालेका केन्द्रीय सदस्य सूर्य ढकालले अग्रतालाई फराकिलो पार्दै गएका छन् ।
दाङ क्षेत्र नम्बर २ (ख) मा कांग्रेसका न्यौपाने विजयी
दाङ क्षेत्र नम्बर २ (ख) मा नेपाली कांग्रेसका नेता प्रचण्डविक्रम न्यौपाने विजयी हुनुभएको छ । न्यौपानेले आफ्ना प्रतिस्पर्धी नेकपा एमालेका उम्मेदवार गिरीराज केसीलाई सात सय २४ मत अन्तरले पराजित गर्दे विजयी हुनुभएको हो ।
