• गोरखापत्र अनलाइन
• ३ भदौ २०८१, सोमबार

दुई महिनादेखि तालाबन्दी, प्रशासनिक काम ठप्प

दाङको बेलझुन्डीस्थित नेपाल संस्कृत विश्वविद्यालयको केन्द्रीय कार्यालयसहित मातहतका शाखामा ताला लाग्दा विगत दुई महिनादेखि प्रशासनिक तथा शैक्षिक गतिविधि ठप्प भएका छन्  । विश्वविद्यालयमा भएको आर्थिक अनियमितताको छानबिन गर्नुपर्ने, केन्द्रीय आयुर्वेद विद्यापीठमा अध्ययनरत विद्यार्थीको प्रयोगात्मकका लागि अस्पताल निर्माण गर्नुपर्ने, छात्रवृत्तिलगायतका माग राख्दै तीन विद्यार्थी सङ्गठनले आन्दोलनको घोषणा गरेका छन् । त्यसै गरी कर्मचारी बढुवा, सुरुवा नियमसङ्गतसँगै अनियमितताको विषय उठाउँदै आंशिक प्राध्यापक र कर्मचारीसमेत गरी असार २ गतेयता विश्वविद्यालयमा चार वटा ताला लगाएका छन् । विश्वविद्यालयमा ताला लाग्दा कर्मचारी आँगनमा रहेको प्रतीक्षालयमा हाजिरी गरेर घर फर्किने गरेका छन् ।