संविधानसभा अध्यक्ष नेम्बाङद्वारा मतदान
संविधानसभा अध्यक्ष तथा नेकपा (एमाले) उपाध्यक्ष सुवासचन्द्र नेम्बाङले देशमा आर्थिक, सामाजिक, सांस्कृतिक परिवर्तन आवश्यक रहेको बताउनु भएको छ ।
निर्वाचन आयुक्त भण्डारीले गर्नुभयो मतदान
निर्वाचन आयोगका निर्वाचन आयुक्त रामप्रसाद भण्डारीले काठमाडौं महानगरपालिकास्थित अनामनगरको मिलन विद्यामन्दिर स्कुल मतदान केन्द्रबाट मतदान गर्नुभएको छ।
लमजुङमा शान्तरुपमा मतदान हुँदै
बेलिना थापालमजुङ, मङ्सिर ४ गते । लमजुङमा प्रतिनिधि सभा तथा प्रदेश सभा निर्वाचन २०७९ को मतदान शान्त रूपमा हुँदैछ । आठ स्थानीय तहका एक सय ३० मतदान स्थलका एक सय ८८ मतदान केन्द्रबाट मतदान कार्य भइरहेको मुख्य निर्वाचन अधिकृतको कार्यालयले जनाएको छ । मुख्य निर्वाचन अधिकृत शिवप्रसाद खनालले शान्तरूपमा मतदान कार्य भइरहेको बताउनुभयो । लमजुङका सबै मतदान केन्द्रमा मतदान भइरहेको जानकारी प्राप्त भएको उहाँले जानकारी दिनुभयो।लमजुङमा एक लाख ३३ हजार ५ सय ५९ जना मतदाता छन् ।
निर्वाचन आयोगका सचिव दुवाडीले गर्नुभयो मतदान
निर्वाचन आयोगका सचिव गोकर्णमणि दुवाडीले काठमाडौं नागार्जुन वडा नं. २ स्थित रेडमडिल स्कुल मतदान केन्द्रबाट मतदान गर्नुभएको छ।
हेटौँडामा मतदान गर्न मतदाताकाे उत्साहजनक उपस्थिति
मकवानपुरको निर्वाचन क्षेत्र नं २ को हेटौंडा उपमहानगरपालिका वडा नं १ रोपवेस्थित मतदान केन्द्रको चहलपहल ।
मतदानलाई असर पार्ने कार्य निस्तेज, ३४ स्थानमा शङ्कास्पद बस्तुको डिस्पोज
प्रतिनिधि तथा प्रदेशसभा सदस्य निर्वाचनको पूर्व सन्ध्यामा देशभर ३४ वटा शङ्कास्पद वस्तु भेटिएपछि डिस्पोज गरिएको छ । देशका विभिन्न ठाउँमा फेला परेका ३४ शङ्कास्पद वस्तु नेपाली सेनाले डिस्पोज गरेको हो ।
शारीरिकरूपमा अशक्त भएका व्यक्तिहरू मतदान गर्नुहुँदै
काठमाडौं जिल्ला क्षेत्र नं. ५ को जोरपाटी चामुण्डा स्कुलमा शारीरिक रुपमा अशक्त भएका व्यक्तिहरू मतदान गर्नुहुँदै ।
एमाले नेता एवं पूर्व मन्त्री हिक्मत कार्कीद्वारा मतदान
विष्णुप्रसाद पोखरेलदमक, मङ्सिर ४ गते । नेकपा एमालेका स्थायी कमिटी सदस्य एवं प्रदेश १ का पूर्व आन्तरिक मामिला तथा कानुनमन्त्री हिक्मत कार्कीले मतदान गर्नुभएको छ । झापाको क्षेत्र नं. ५ (१) बाट प्रदेश सभा सदस्यको उम्मेद्वार रहनुभएका उहाँले गौरादह ३ सूर्योदय आधारभूत विद्यालयको मतदान केन्द्रबाट मतदान गर्नुभएको हो ।
प्रदीप ज्ञवालीले गर्नुभयो मतदान
नेकपा एमालेका उपमहासचिव तथा गुल्मी १ का प्रतिनिधि सभा उम्मेदवार प्रदीपकुमार ज्ञवालीले रुरुक्षेत्र गाउँपालिका ४ को बम्घा निमाबी चौतारा बुथ बाट मतदान गर्नु भएको छ ।
गगन थापाले गर्नुभयो मतदान
नेपाली कांग्रेसका महामन्त्री एवं काठमाडौं क्षेत्र ४ का प्रतिनिधि सभा सदस्यका उम्मेदवार गगनकुमार थापाले मतदान गर्नुभएको छ ।
स्याङ्जाको एक मतदान केन्द्रमा मतदान ढिला
राधाकृष्ण डुम्रेवालिङ, मङ्सिर ४ गते । स्याङ्जाको चापाकोट नगरपालिका १० मा रहेको बोटेटार मावि मतदान केन्द्रमा विवादका कारण मतदान ढिला भएको छ। दलीय प्रतिनिधिको विषयमा विवाद बढेपछि मतदानमा ढिलाइ भएको हो । प्रतिनिधिहरूको सम्बन्धमा सहमतिको प्रयास जारी रहेको क्षेत्र नं. २ का निर्वाचन अधिकृत रामचन्द्र शर्माले जानकारी दिनुभयो । शर्माका अनुसार दल तथा स्वतन्त्रका प्रतिनिधिहरू राख्ने विषयमा सहमति नजिक पुगेको र अब छिट्टै मतदान सुरु हुनेछ । मुख्य निर्वाचन अधिकृतको कार्यालयका अनुसार प्रतिनिधि सभा तथा प्रदेश सभा सदस्य निर्वाचन जिल्लाको एक सय ९९ मतदान स्थलभित्र ३ सय २० मतदान केन्द्रमा मतदान केन्द्रमध्ये चापाकोट १० को बोटेटार मतदान केन्द्र बाहेक अन्य ठाउँमा मतदान सुरु भएको छ । यस्तै, कारागारको एक अस्थायी मतदान केन्द्रमा पनि मतदान सुरु भएको छ । सबै मतदान केन्द्रमा सौहार्द रूपमा मतदान सुरु भएको स्याङ्जाका मुख्य निर्वाचन अधिकृत रोमाकान्त ज्ञवालीले जानकारी दिनुभयो । प्रतिनिधि सभा सदस्य र प्रदेश सभा सदस्यको चुनावका लागि स्याङ्जामा दुई लाख ४४ हजार ८९ जना मतदाता रहेका छन् । २०७९ मसिंर ३ गते सम्म १८ वर्ष उमेर पुगेका र मतदाता नामावलीमा नाम भएका व्यक्तिहरूले मतदान गर्न पाउनेछन् ।स्याङ्जा क्षेत्र नं १ मा एक लाख २७ हजार चार सय ११ जना र क्षेत्र नं २ मा एक लाख १६ हजार छ सय ७८ जना मतदाता रहेका छन् । क्षेत्र नं १ (क) मा ६२ हजार पाँच सय ५७ जना र (ख) मा ६४ हजार ८ सय ५४ जना मतादाता रहेका छन् । त्यस्तै क्षेत्र नं २ (क) मा (५४) हजार एक सय ९१ र (ख) मा ६२ हजार चार सय ८७ जना मतदाता रहेका छन् । यता क्षेत्र नं. २ का १५० मतदान केन्द्रमा शान्त रूपमा तोकिएकै समयमा मतदान सुरु भएको क्षेत्र नं. २ का निर्वाचन अधिकृत रामचन्द्र शर्माले जानकारी दिनुभयो ।
सुनिल थापाले गर्नुभयो मतदान
नेपाली कांग्रेसका केन्द्रीय सदस्य तथा धनकुटाबाट प्रतिनिधि सभा सदस्य उमेद्वार सुनिल बहादुर थापाले धनकुटाको राम माबि मुगाबाट मतदान गर्नु भएको छ ।
आज चार्टड उडानमात्र हुँदै
प्रतिनिधि र प्रदेश सभा सदस्य निर्वाचनको दिन आज आन्तरिक उडान नहुने भएको छ ।
उत्साहजनक रूपमा मतदान (फोटो फिचर)
आइतबार (आज) प्रतिनिधि र प्रदेश सभा सदस्य निर्वाचन एकैसाथ भइरहेको छ । निर्वाचन बिहान ७ बजेदेखि सुरु भएको निर्वाचन आयुक्त ईश्वरप्रसाद पौडेलले बताउनु भयो ।
गठबन्धनका साझा उम्मेदवार शर्माले गर्नुभयो मतदान
लीलाधर ओलीघोराही, मंङसिर ४ गते । नेकपा माओवादी केन्द्रका स्थायी समिति सदस्य तथा दाङ निर्वाचन क्षेत्र नं २ का गठबन्धनका साझा उम्मेदवार पूर्वमन्त्री रेखा शर्माले मतदान गर्नुभएको छ । शर्माले दाङको घोराही उपमहानगरपालिका १८ रझेना मतदान केन्द्रबाट मतदानमा गर्नुभएको हो । यस्तै, उम्मेदवार शर्मा नेकपा एमालेका महासचिव शङ्कर पोखरेलसँग प्रतिस्पर्धामा हुनुहुन्छ ।
एमाले वरिष्ठ उपाध्यक्ष पोखरेलले गर्नुभयो मतदान
नेकपा (एमाले)का वरिष्ठ उपाध्यक्ष एवं काठमाडौं क्षेत्र नम्बर ५ का प्रतिनिधि सभा उम्मेदवार इश्वर पोखरेलले आफ्नो मताधिकार प्रयोग गर्नुभएको छ । काठमाडौंको क्षेत्र नम्बर ५ को टोखा नगरपालिका– ५ बाट उहाँले मतदान गर्नुभएको हो ।
विवेकको मत सुझबुझ ढङ्गले प्रयोग गरौँ–प्रमुख आयुक्त थपलिया
निर्वाचन आयोगका प्रमुख आयुक्त दिनेशकुमार थपलियाले विवेकको मत सुझबुझ ढङ्गले प्रयोग गर्नुपर्ने बताउनुभएको छ ।
प्रदेश १ मा मतदाताको उत्साहजनक उपस्थिति
प्रतिनिधि सभा र प्रदेश सभाको निर्वाचन अन्तर्गत प्रदेश १ का मतदान केन्द्रहरुमा आइतबार बिहान ७ बजेबाट मतदान प्रारम्भ भएको छ । सबै मतदान केन्द्रमा साँझ ५ बजेसम्म मतदान जारी रहने छ ।
मन्थली मतदान केन्द्रमा मतदान ढिला
रामेछाप सदरमुकामको मन्थली मतदान केन्द्रमा बिहान ८ बजेसम्म पनि मतदान सुरु हुन सकेको छैन । निर्वाचन आयोगले बिहान ७ बजेदेखि साँझ ५ बजेसम्म मतदान गर्ने भने पनि जिल्ला सदरमुकामस्थित जिल्ला समन्वय समितिमा रहेको मतदान स्थलमा ८ बजेसम्म पनि मतदान सुरु नभएको हो ।
अर्थमन्त्री शर्माद्वारा मतदान
राजु लामिछाने रुकुमपश्चिम, मङसिर ४ गते । प्रतिनिधिसभा सदस्यका उम्मेदवारसमेत रहनुभएका अर्थमन्त्री जनार्दन शर्माले मुसीकोट नगरपालिका ५ सेरीगाउँस्थित यमुनानन्द नमुना माविमा रहेको 'क' मतदान केन्द्रबाट मतदान गर्नुभएको छ । शर्माले मतदान केन्द्रमा पहिलो मत खसाल्नुभएको मतदान अधिकृत जोखबहादुर खड्काले जानकारी दिनुभयो । मतदानपछि शर्माले सबैलाई ढुक्क भएर सही तरिकाले मतदान गर्न आह्वान गर्नुभयो । माओवादी केन्द्रका उपमहासचिवसमेत रहनुभएका अर्थमन्त्री शर्मा वाम लोकतान्त्रिक गठबन्धनको तर्फबाट साझा उम्मेदवार हुनुहुन्छ ।
निर्वाचन आयुक्त तुलाधरद्वारा मतदान
निर्वाचन आयोगका निर्वाचन आयुक्त जानकी तुलाधरले लमजुङस्थित सुन्दर बजार नगरपालिका २ महेन्द्र मन्दिर मावि परेवाडाँडा मतदान केन्द्रबाट मतदान गर्नुभएको छ।
कडा सुरक्षाबीच मतदान हुँदै
आइतबार (आज) प्रतिनिधि र प्रदेश सभा सदस्य निर्वाचन एकैसाथ भइरहेको छ । बिहान ७ बजेदेखि सुरु भएको निर्वाचनको सुरक्षा व्यवस्था कडा रहेको नेपाल प्रहरीले जनाएको छ ।
ऊर्जामन्त्री भुसालले गर्नुभयो मतदान
ऊर्जा, जलस्रोत तथा सिँचाइमन्त्री पम्फा भुसालले ललितपुर महानगरपालिका–२ स्थित राजतीर्थ मतदान केन्द्रबाट मतदान गर्नुभएको छ । वाम लोकतान्त्रिक गठबन्धनका तर्फबाट उहाँ ललितपुर क्षेत्र नं ३ को उम्मेदवार हुनुहुन्छ । सो अवसरमा उहाँले लोकतन्त्रको अभ्यास गर्ने महत्वपूर्ण नमूनाको रुपमा मतदानलाई लिनुपर्ने टिप्पणी गर्नुभयो ।
मन्त्री चौधरीले गर्नुभयो मतदान
सहरी विकास मन्त्री एवं दाङ क्षेत्र नम्बर १ का प्रतिनिधि सभा सदस्यका उम्मेदवार मेटमणी चौधरीले गढवा गाउँपालिका स्थित जनता माध्यमिक विद्यालयमा रहेको बुथ नम्बर (ग) बाट मताधिकार प्रयोग गर्नुभएको छ ।
युवा तथा खेलकुद मन्त्री अथकद्वारा मतदान
सिराज खान नेपालगञ्ज, मङ्सिर ४ गते । युवा तथा खेलकुद मन्त्री महेश्वर गहतराज अथकले बाँकेको कोहलपुरमा मतदान गर्नुभएको छ । उहाँले बाँके क्षेत्र नं १ कोहलपुरको पिपिरीस्थित मतदानस्थलबाट पहिलो मतदान गर्नुभएको हो ।मन्त्री अथकसँगै लुम्बिनी प्रदेश सभाका निवर्तमान सदस्य पार्वती पुन उषा र आइपी खरेलले पनि मतदान गर्नुभएको छ । मन्त्री अथक बाँके क्षेत्र नं १ प्रतिनिधि सभाका उम्मेदवार पनि हुनुहुन्छ ।
