रमेश विश्वकर्मा
गुल्मी, फागुन १७ गते । गुल्मीमा बिहीबार बिहान करिब १०ः३० बजेको समयमा आगलागीका कारण एक गोठ जलेर पूर्ण रूपमा नष्ट भएको छ । जिल्लाको धुर्कोट गाउँपालिका–४ का नारायण पोखरेलको टिनले छाएको गोठ जलेर पूर्णरुपमा नष्ट भएको जिल्ला प्रहरी कार्यालय गुल्मीका प्रहरी नायब उपरीक्षक डिल्लीनारायण पाण्डेले जानकारी दिनुभयो ।
आगो निभाउने क्रममा एक जना सामान्य घाइते समेत हुनुभएको छ । निभाउनेक्रममा स्थानीय ३६ वर्षीय सीता विकको बायाँ गालामा हल्का जलेर घाइते हुनुभएको छ । घाइतेको स्थानीय अस्पतालमा उपचार भइरहेको प्रहरीको भनाइ छ ।
कुँडो पकाउने चुलोमा रहेको आगो सल्किन गई गोठमा आगलागी भएको बताइएको छ । आगलागीले गोठमा बाँधिराखेका भैँसीसहित पशुचौपाया जलेर घाइते भएको प्रहरीको भनाइ छ ।
गोठ पूर्णरुपमा जलेर क्षति भई घरको पाली समेत जलेको छ । स्थानीयको सहयोगमा आगो पूर्णरुपमा नियन्त्रणमा आएको, सो आगोबाट करिब ३ देखि ४ लाख रुपियाँ बराबरको क्षति भएको प्रहरीले जनाएको छ ।
