विनय कर्ण
कल्याणपुर (सप्तरी), मङ्सिर १३ गते । सप्तरीमा बिहेको प्रलोभन देखाइ शारीरिक सम्बन्ध बनाएपछि एक नबालिका बिच्चलीमा परेकी छन् ।
हनुमाननगर कंकालिनी नगरपालिका वडा नम्बर १४ का २२ वर्षीय परमेश्वर कुमार मुखियाले नाबालिकालाई प्रेममा फँसाएर बिहेको प्रलोभन देखाइ शारीरिक सम्बन्ध बनाएर छाडेपछि उनी बिच्चलीमा परेकी हुन् ।
झापाको बिर्तामोडमा सडक मर्मत कार्यको रेखदेख गर्दै आउनुभएका परमेश्वरले पहिलेदेखि आफूलाई प्रेम गर्दै आएको र मङ्सिर ६ गते बिहे गर्ने भनेर विर्तामोड बोलाई दुई दिनसम्म त्यही राखेर शारीरिक सम्बन्ध स्थापित गरेको पीडित नाबालिकाले बताइन् ।
“तिमीसँग बिहे गर्छु भन्दै विर्तामोड बोलाएर शारीरिक सम्पर्क गर्यो, पछि जन्मदर्ता प्रमाणपत्र ल्याउनुपर्छ भन्दै मलाई भारदहसम्म ल्याएर त्यहि छोडिदियो ।’’ नबालिकाले भनिन् ।
दुई दिनपछि घर आएकी नाबालिककासँग बुबाआमाले सोधखोज गरेपछि घटना बाहिरिएको हो । नबालिकका बुबाआमाले यसबारे परमेश्वरका बुबाआमासँग बिहेबारे कुरा गरेपनि अस्वीकार गर्दा छोरी बिचल्लीमा परेको पीडितका बुबा बताउनुहुन्छ ।
परमेश्वरले मोबाइलको स्विच अफ राखेको र बुबाआमा पनि बिहे गर्न नमान्दा प्रहरीसमक्ष उजुरी दिएको पीडितका बुबा बताउनुहुन्छ ।
जिल्ला प्रहरी कार्यालय सप्तरीमा घटनाबारे जाहेरी आएको र त्यसलाई आवश्यक कारबाही प्रक्रियाका लागि इलाका प्रहरी कार्यालय हनुमाननगर पठाइएको प्रहरी नायब उपरीक्षक डम्बर बहादुर पुरीले जानकारी दिनुभयो ।
