सर्लाही समाचारदाता
सर्लाही, मङ्सिर १३ गते । पूर्वपश्चिम राजमार्ग विस्तार अन्तर्गत पुल र कलभर्ट निर्माण कार्यलाई प्राथमिकता दिन थालिएको छ । राजमार्ग विस्तार भइरहेका तीन वटै जिल्लामा अहिले पुल र कलभर्ट निर्माणको कामले प्राथमिकता पाएको हो । गत वर्ष पुसदेखि धनुषाको कमला पुलदेखि पश्चिम सर्लाहीको बागमतीसम्मको राजमार्ग विस्तार गर्ने काम जारी रहेको छ ।
कमला–ढल्केबर–पथलैया सडक योजना अन्तर्गत पूर्वी खण्डमा धनुषा, महोत्तरी र सर्लाहीमा ठेक्का लागेर तीव्रताका साथ काम भइरहे पनि रौतहट र बाराको सडक विस्तारका लागि भने अझै ठेक्का लाग्न बाँकी नै छ । कमला–ढल्केबर–पथलैया सडक योजना पूर्वीखण्डका आयोजना प्रमुख एवं सिनियर डिभिजनल इन्जिनियर राजेशकुमार दासले दर्जनौँ स्थानमा डाइभर्सन निर्माण गरी पुल र कलभर्टको काम धमाधम भइरहेको जानकारी दिनुभयो । अधिकांश स्थानमा साँघुरा रहेका पुल पूर्ण रूपमा भत्काएर नयाँ निर्माणको काम भइरहेको छ । अहिले रहेकै पुलसमेत सञ्चालन हुने अवस्था रहेको ठाउँमा भने छेउछाउमा अर्को पुल निर्माण गरेर काम अघि बढाइएको आयोजना प्रमुख दासले बताउनुभयो ।
यसअघि लच्का (कच्वे) रहेको ठाउँमा अब सडकभन्दा तलबाट पानी बग्ने गरी व्यवस्थित किसिमको कलभर्ट निर्माण भइरहेको सडक आयोजनाले जनाएको छ । पुल र कलभर्ट निर्माण भइरहेकाले सर्लाहीमा ईश्वरपुर, लालबन्दी, हरिवन र बागमती नगरपालिकाका एक दर्जनभन्दा बढी स्थानमा डाइभर्सन निर्माण गरेर सवारीसाधन आउजाउ गर्ने व्यवस्था मिलाइएको छ ।
रुख कटानको अनुमति प्राप्त नहुँदा जङ्गल क्षेत्रमा काम अघि बढाउनै नसकिएको निर्माण व्यवसायीले बताएका छन् । यस्तै घना बस्ती रहेको क्षेत्रमा पनि केही ठाउँबाहेक धेरै ठाउँमा व्यक्तिगत, सामुदायिक र सरकारी पक्की संरचना भत्काउने, बिजुलीको खम्बा हटाउने, टेलिफोन तथा इन्टरनेटको तार हटाउने र खानेपानीको तार व्यवस्थापन गर्ने काम चुनौतीका रूपमा देखा परेको छ ।
कमला–ढल्केबर–पथलैया सडक योजनाका सूचना अधिकारी एवं इन्जिनियर राजकिशोर सिंहले ‘साइट क्लिन’ भएको ठाउँमा सडक विस्तार, कलभर्ट तथा पुल निर्माणको काम जारी रहेको जानकारी दिनुभयो । कमला पुलदेखि पथलैयासम्मको १३० किलोमिटर पूर्वपश्चिम राजमार्ग सन् २०२७ सम्म निर्माण सक्ने गरी तीन खण्डमा ठेक्का लागेर काम भइरहेको छ ।
सहरी तथा बजार क्षेत्रमा छ लेनसहित ३१ मिटर फराकिलो र त्यसबाहेक अन्य ठाउँमा ‘मेडियन’ सहित १८ मिटर चौडाइमा चार लेनको सडक निर्माण हुने छ । सडक विस्तारको काम गर्न विश्व बैङ्कले १८ अर्ब ६० करोड रुपियाँ ऋण सहयोग प्रदान गरेको छ ।
