अमरराज नहर्की
तनहुँ, मङ्सिर १३ गते । नेकपा एमालेको एघारौँ महाधिवेशन नजिकिँदै गर्दा तनहुँमा प्रतिनिधि छनोट प्रक्रिया निकै प्रतिस्पर्धात्मक बनेको छ । मनोनयन दर्ता भइसके पनि एकजनाले समेत नाम फिर्ता नलिएपछि शनिबार निर्वाचन हुने भएको हो । निर्वाचन संयोजक अधिवक्ता शिवदत्त ढकालका अनुसार आकाङ्क्षी धेरै भए पछि सहमतिमा पुग्न नसकिएको र त्यसैले मतदानमा जानु अनिवार्य भएको हो ।
संयोजक ढकालले भन्नुभयो, “६२ जनाले दाबी गरेको अवस्थामा सहमति सम्भव भएन । नाम फिर्ता नआएपछि निर्वाचन नै सबैभन्दा पारदर्शी उपाय हो । ठुलो सङ्ख्यामा उम्मेदवार भएपछि व्यवस्थापनमा पनि चुनौती बढेको छ ।” क्षेत्र नं. १ मा डुम्रेस्थित उद्योग वाणिज्य संघको भवनमा र क्षेत्र नं. २ मा खैरेनीटार खानेपानी उपभोक्ता संस्थाको भवनमा मतदान स्थल तोकिएका छन् । दलित तर्फको प्रतिनिधि छनोट जिल्ला पार्टी कार्यालयमै हुनेछ ।
क्षेत्र नं. १ बाट २ खुला, २ महिला र १ युवा गरी ५ जना र क्षेत्र नं. २ बाट ३ खुला, २ महिला र १ युवा गरी ६ जना प्रतिनिधि चयन गरिनेछ । साथै १ दलित प्रतिनिधि मनोनयन हुनेछ । यी १२ सिटका लागि ६२ जना आकाङ्क्षीले मनोनयन दर्ता गराएका छन् ।
क्षेत्र नं. १ मा खुलातर्फ १२, महिलातर्फ ७ र युवातर्फ ८ जना छन् । क्षेत्र नं. २ मा खुलातर्फ १८, महिलातर्फ ६ र युवातर्फ ४ जना दर्ता भएका छन् । दलित तर्फ ६ जना प्रतिस्पर्धामा छन् । एमाले तनहुँका सचिव प्रदीप अधिकारीका अनुसार, अन्तिम क्षणसम्म सहमतिको प्रयास भए पनि “नाम फिर्ता नआएपछि मतदान बाहेक विकल्प थिएन ।”
महाधिवेशन आयोजकको हैसियतमा किरण गुरुङ, टुकराज सिग्देल, केदार सिग्देल, भगवती न्यौपाने र सविता रसाइली स्वतः प्रतिनिधि रहने छन् । अन्तिम नामावली प्रकाशित गर्सिकिएको एमाले तनहुँले जनाएको छ ।
