बाबुराम कार्की
वराहक्षेत्र, मङ्सिर १३ गते । पूर्वसन्ध्याको दृश्यावलोकनका लागि पछिल्लो समय सप्तकोशी किनारमा मानिसको भिड लाग्न थालेको छ । किनार क्षेत्रबाट देखिने सूर्यास्तको दृश्य, बालुवाका कण र पानीमा पर्ने सूर्यका सुनौलो किरणका निकै मनमोहक हुने भएकाले बोराबाँधमा मानिसको भिड लाग्ने गरेको हो ।
सुनसरीको वराहक्षेत्र–२ र ६ को सिमानामा पर्ने बोराबाँध क्षेत्रले अहिने छुट्टै पहिचान बनाउन थालेको छ । स्थानीय युवाको पिकनिक स्पट, टिकटक र फोटो खिच्नेको आकर्षक क्षेत्रका रूपमा रहेको बोराबाँधले परिचय बनाउन थालेको छ ।
उदाउँदो सूर्यको झुल्को हेर्न इलामको श्रीअन्तु पुग्ने पर्यटक सूर्यास्तको मनोरम दृश्य हेर्न कोशी किनारको बोराबाँध आउने गरेको स्थानीय भीषण राई बताउनुहुन्छ । उहाँ भन्नुहुन्छ, “यति राम्रो प्राकृतिक दृश्यावलोकन स्थलको प्रचारप्रसार नहुँदा ओझेलमा पर्दै आएको थियो । पछिल्लो समय भने यहाँ आउनेको सङ्ख्या बढ्दै छ ।”
बोराबाँधब क्षेत्रमा थप रौनकता ल्याउन स्थानीय पर्यटन व्यवसायीले मोटरबोट पनि सञ्चालनमा ल्याएका छन् । मोटरबोटमा चढेर सूर्यास्तको दृश्यावलोकनमा पर्यटकको आकर्षण बढेको छ । सो क्षेत्रमा पर्यटकलाई थप आकर्षण गर्न घोडाको व्यवस्था पनि गरिएको छ ।
सप्तकोशीमा देखिने अस्ताउँदो सूर्यको मनोरम दृश्यावलोकन गर्न पछिल्लो समय धरान, इटहरी, विराटनगर, दमक, गाईघाट, बेलटार र फत्तेपुरलगायतका क्षेत्रबाट मानिस आउने गरेका छन् । विराटनरबाट सूर्यास्तको दृश्य हेर्न आएका चेतु पाण्डे भन्नुहुन्छ, “कोशी किनारबाट देखिने मनोरम दृश्य समुद्रको दृश्यभन्दा कम छैन । यस्तै बालुवाको बगरमा रमाउन लाखाँै खर्च गरेर विदेश जानेको लर्काे छ । आफ्नै देशमा भएको प्राकृतिक सुन्दरताले भरिपूर्ण स्थल भने ओझेलमा छन् ।”
अस्ताउँदो सूर्य, कोशीको पानीमा उठ्ने लहर, लहरसँगै उठ्ने चिसो बतासको स्पर्श र पानी तथा बालुवामा छरिएका सुनौला किरणको दृश्यले पर्यटकलाई तान्ने गरेको छ । पछिल्लो समय बोराबाँध सन्ध्याकालीन मात्र नभई नाइट स्टेका लागि समेत युवापुस्तामाझ लोकप्रिय बन्दै गएको छ । बर्सांैदेखि ओझेलमा परेको यस क्षेत्रका आकर्षक पर्यटकीय स्थलमा पर्यटको आगमन बढ्दै गएको छ । दैनिक पाँच सयदेखि हजारभन्दा बढी मानिस घुम्न आउने गरेको भीषण राई बताउनुहुन्छ ।
पर्यटकको चहलपहल बढेसँगै बोराबाँध क्षेत्रमा कफी पसलदेखि साना खाजानास्ताका होटेल सञ्चालनमा रहेका छन् । दैनिक मानिसको बाक्लो उपस्थिति हुँदा व्यापारसमेत बढ्दै गएकोे होटेल सञ्चालक बताउँछन् ।
पूर्वपश्चिम राजमार्गको कान्छीचोकबाट कालाबन्जार हँुदै र झुम्काबाट रामधुनी हुँदै चव्रmघट्टीबाट बोराबाँध पुग्न सकिन्छ । चतराबाट तेह्रअडी हँुदै बोराबाँध पुगिन्छ । छोटो दुरीमै पुग्न सकिने सप्तकोशीको मनरोम दृश्य हेर्ने बोराबाँधमा दैनिक सयौँकोे सङ्ख्यामा मानिसको चहलपहल हुँदै आएको छ । छोटो दुरीमै पुगिने भएकाले आन्तरिक पर्यटकको भिड लाग्ने गरेको छ । नेपाललगायत भारतको विहारबाट दैनिक पर्यटक आउने गरेको बताइएको छ ।
पर्यटनको प्रचुर सम्भावना बोकेको कोशी किनारको थप प्रचारप्रसारका साथै भौतिक विकासका काम हुनुपर्ने स्थानीयको भनाइ छ । फराकिलो सम्भावना बोकेको सप्तकोशीलाई पर्यटकीय स्थलमा विकास गर्दै प्रवर्धन गर्न सके यस क्षेत्रको पर्यटकीय विकासमा सहयोग पुग्ने छ ।
