रामकृष्ण बोहरा
बागलुङ, मंसिर १३ गते । पश्चिम बागलुङको गलकोट नगरपालिका वडा नं. २ को नरेठाँटी बजारदेखि वडा नं. १ को कार्यालय दुदिलाभाटी जाने सडक कालोपत्र हुने भएको छ । झण्डै २ किलोमिटर सडक आर्थिक वर्ष २०८१/०८२ मा सुरु भइ आगामी पुसमा सक्ने लक्ष्यका साथ आवश्यक सामग्री जुटाएर ठेकेदार पक्षले काम थालेको छ ।
सहर उन्मुख गलकोटलाई व्यवस्थित बनाउने, पूर्वाधारमा अब्बल र सहरी शासकीय क्षमता विकास गर्न नरेठाँटी–दुदिलाभाटी जोड्ने सडकसहित गलकोटमा आधादर्जन योजना सञ्चालनमा छन् । सघन सहरी तथा भवन निर्माण आयोजना कार्यालयको सहयोगमा सञ्चालित आयोजना सम्पन्न हुने चरणमा पुगिसकेको गलकोट नगरपालिका वडा नं. २ का वडा अध्यक्ष हिमबहादुर भण्डारीले जानकारी दिनुभयो ।
नगरको विकासलाई व्यवस्थित बनाउने, विकासले प्रभाव पारेका स्थानीयलाई आयआर्जनमा जोड्ने, नगरको आफ्नै शासकीय क्षमता बढाएर चुस्त बनाउने लक्ष्य यो कार्यक्रममा छ । आयोजनाको साझेदारीमा नगरपालिकाले पूर्वाधार निर्माणको काम गरिरहेको छ ।
नरेठाँटी–दुदिलाभाटी सडकले दुवै वडाबासीले सहज यात्रा गर्न पाउने छन् । सडक सहज भएपछि सडक छेउमा कृषि फर्महरु पनि सञ्चालनमा आएका छन् । सकडले कृषि फसल बजारीकरणमा सहज भएपछि किसानहरु खुसी भएका छन् । ‘‘सडकले नरेठाँटी पढ्न जाने विद्यार्थीलाई सहज हुनुका साथै कृषि फसल बजार पठाउन पाएपछि किसानहरु व्यवसायिक खेतीतर्फ अग्रसर हुन उत्साहित देखिएका छन्’’ स्थानीय लालबहादुर खत्रीले भन्नुभयो ।
सघन सहरी तथा भवन निर्माण आयोजना कार्यालयकै साझेदारीमा कोतघर जाने सडक कालोपत्र गर्ने तयारी समेत थालिएको छ । सहरी शासकीय क्षमता विकासका लागि दुई करोड लागतमा वडा नं. ३ को भवन निर्माण गरिएको छ । पूर्वाधारतर्फ धेरै काम सम्पन्न भएको र चालु आर्थिक वर्षकै फागुन महिनासम्ममा सबै काम सम्पन्न गरेर हस्तान्तरण गर्ने बागेश्वरी निर्माण कम्पनीका प्रतिनिधि सन्तोष तामाङले बताउनुभयो ।
यो सडक कालोपत्र बन्दा गलकोट हुँदै बरेङ जाने सडक पनि सहज बन्दैछ । गलकोटलाई सहरी क्षेत्रको रुपमा विकास गर्दै व्यवस्थित सडक, ढल निकास, शासकीय क्षमता विकास गर्ने लक्ष्यले पूर्वाधारको काम भएको आयोजनाका प्रमुख कृष्णकुमार मर्हजनले बताउनुभयो । गलकोटमा भवन निर्माण संहिता पालना गराउने, सडक मापदण्डलाई कायम गरेर भवन निर्माणको नक्सापास गराउन पहल गर्ने काममा समेत आयोजनाले साथ दिएको छ ।
