अमरराज नहर्की
तनहुँ, मङ्सिर १३ गते । गण्डकी प्रदेश सरकारअन्तर्गत तनहुँका दुईवटा कार्यालयको एकीकृत सेवा सुरु भएको छ । प्रदेश सरकारले यसअघि दुई वटा कार्यालय एकीकृत गर्ने निर्णय गरेअनुसार जिल्लामा रहेका सामाजिक विकास कार्यालय र उद्योग तथा पर्यटन विकास कार्यालयको एकीकृत सेवा सुरु भएको हो ।
दुवै कार्यालयको साविकको नाम परिवर्तन गरी गण्डकी प्रदेश सरकार, उद्योग तथा पर्यटन मन्त्रालय र सामाजिक विकास, युवा तथा खेलकुद मन्त्रालय, एकीकृत सेवा कार्यालय नामाकरण भएको छ । गण्डकी प्रदेश मन्त्रिपरिषदको बैठकले प्रदेशअन्तर्गतका सात निर्देशनालय खारेज र केहि निकाय एकीकरण गर्ने निर्णय गरेसँगै तनहुँका बिहीबारबाट कार्यान्वयन गरेको हो ।
एकीकृत कार्यालय भएसँगै साविकको समाजिक विकास कार्यालयबाट सामाजिक तथा शिक्षा शाखा सञ्चालन गरिएको छ भने साविकको उद्योग तथा पर्यटन कार्यालयबाट योजना तथा प्रशासन र उद्योग तथा पर्यटन सेवा प्रदान गरिएको छ साविक सामाजिक विकास कार्यालयका प्रमुख बिदुरहरी आचार्यले जानकारी दिनुभयो । दुईमध्ये एक स्थानबाट मात्रै सेवा प्रदान गर्न पूर्वाधारको अभाव भएकोले दुई स्थानबाटै सेवा प्रदान गर्नु परेको आचार्यले बताउनुभयो ।
