दिलबहादुर सिंह
सिलगढी, कात्तिक १९ गते । डोटी जिल्लाका सायल र बोगटान फुड्सिल गाउँपालिकाले जाजरकोट जिल्लाको बारेकोट गाउँपालिका–१ रामिडाँडा केन्द्रबिन्दु भएर गएको भूकम्पका कारण पीडित भएकालाई दुई÷दुई लाख रुपियाँ आर्थिक सहयोग प्रदान गर्ने घोषणा गरेका छन् ।
डोटीको सायल गाउँपालिकाका अध्यक्ष धर्मराज जोशीद्वारा हस्ताक्षरित विज्ञप्तिमा उल्लेख गरिए अनुसार जाजरकोट र रुकुम जिल्ला विपद् व्यवस्थापन समितिको राहत कोषमा तत्काल सद्भाव स्वरूपमा एक एक लाख रुपियाँ जम्मा गर्ने जनाइएको छ । यसै गरी डोटीको बोगटान फुड्सिल गाउँपालिकाद्वारा प्रकाशित विज्ञप्ति अनुसार भूकम्पका कारण अति प्रभावित कर्णाली प्रदेशका जाजरकोट र रुकुम जिल्ला विपद् व्यवस्थापन समिति को खातामा तत्कालै एक एक लाख रुपियाँ गरी दुई लाख रुपियाँ उपलब्ध गराउने उल्लेख गरिएको छ ।
डोटीको बोगटान फुड्सिल गाउँपालिका अध्यक्ष कमलबहादुर गडसिलाद्वारा हस्ताक्षर गरिएको विज्ञप्तिमा ‘दुःखको समयमा पालिकाबाट सद्भाव स्वरूप तत्कालीन रुपमा राहत उपलब्ध गराइएको र भूकम्पबाट प्रभावितहरूलाई सुरक्षित स्थलतर्फ तत्काल स्थानान्तरण गर्न र भूकम्पमा परी पुरिएकाहरूको खोज उद्धार तथा घाइतेहरूको उपचार तथा राहत कार्यमा सक्रियका साथ लाग्न सबैसँग अपिल गर्दछौँ ’ भनी उल्लेख गरिएको छ ।
