सरकारले नेपाली चलचित्रलाई उपेक्षा गरेको कलाकारको आरोप

काठमाडौं, जेठ १८ गते । चलचत्रि विकास बोर्डका अध्यक्ष भुवन केसीले चलचित्र क्षेत्रलाई सरकारले उपेक्षा गरेको बताउनुभएको छ । बिहीबार काठमाडौंमा एक कार्यक्रममा बोल्नुहुँदै उहाँले बोर्डले आवश्यक ठानेर पठाएको मागलाई बेवास्ता गर्दै सरकारले बजेटमा चलचित्र क्षेत्रलाई उपेक्षा गरेको बताउनुभएको हो । 

उहाँले नेपाली चलचित्रको प्रवद्र्धनका लागि स्टुडियो बनाउने कुराले खुशी बनाएपनि बोर्डले विज्ञ र सम्बन्धित संस्थाहरुसँग छलफल गरी बजेट निकासा गर्न आग्रह गरेको फाइलअनुसार अर्थ मन्त्रालयले चलचित्र क्षेत्रका लागि बजेट नदिएको बताउनुभयो । उहाँले बजेटमा सरकारले विदेशी चलचित्र आयात गर्ने कुरामा पाँच प्रतिशत कर लगाउनुपर्ने कुरालाई बेवास्ता गर्दै एक प्रतिशत मात्रै लगाउने नीति लिएकोप्रति पनि असन्तुष्टि जनाउनुभयो ।

उहाँले भन्नुभयो, "नेपाली चलचित्रको प्रवद्र्धनका लागि स्टुडियो आवश्यक छ । एउटा स्टुडियो पनि नभएको अवस्थामा दुई वटा स्टुडियो अवधारणा आयो, त्यो सुन्ने बित्तिकै हामी हर्षित भयौं एउटा काभ्रे र अर्को दोलखाको । सरकारप्रति हामी खुशी भयौं । अर्को विदेशी चलचित्र आयात गर्ने बारेमा हामी सबैले छलफल गरेर सुझाव दिएका थियौं की, विदेशी चलचित्रको शुल्क पाँच प्रतिशतसम्म गरियोस् वा एक लाखसम्म गरियोस् भन्ने माग थियो । तर त्यसमा आउँदा १ प्रतिशत मात्रै आयो । हामीले चलचित्र सम्बन्धी आवश्यक कुरा मन्त्रालयमा बढाएका छौं । यस बारेमा जानकारी लिँदा अर्थ मन्त्रालयसम्म पुगेको रहेछ । अर्थ मन्त्रालयबाट हामीले पठाएको माग भन्दा ठिक उल्टो गरी आएको छ । प्रधानमन्त्री ज्यू भारतभ्रमणबाट आउनेबित्तिकै यसबारेमा कुरा गर्ने सञ्चार तथा सूचना प्रविधिमन्त्रीले आश्वासन दिनुभएको छ।"

कार्यक्रममा अध्यक्ष केसीले चलचित्र क्षेत्रलाई सरकारबाट चासो नदिएकोप्रति प्रधानमन्त्रीको भारत भ्रमणपछि विस्तृत रुपमा छलफल गर्ने बताउनुभयो ।