भवानीदत्त भट्ट
कञ्चनपुर, वैशाख २६ गते । मोटरसाइकलसहित जलेर मृत फेला पर्नुभएका बेलडाँडीका हरिकिसन राना मृत्यु प्रकरणको अनुसन्धानका लागि प्रहरी उपरीक्षक श्याम ओलियाको नेतृत्वमा पाँच सदस्यीय छानबिन समिति गठन गरिएको छ ।
नेपाल प्रहरी प्रधान कार्यालयका केन्द्रीय प्रहरी प्रवक्ता प्रहरी नायव महानिरीक्षक अबि नारायण काफ्लेले हरिकिसन राना मृत्यु प्रकरणको अनुसन्धानका लागि प्रहरी उपरीक्षक ओलियाको नेतृत्वमा पाँच सदस्यीय छानबिन समिति गठन गरिएको बताउनुभयो ।
प्रहरी उपरीक्षक ओलियाको नेतृत्वमा गठित छानबिन समितिमा प्रहरी निरीक्षक रावलसहित पाँच सदस्य रहनुभएको छ । जिल्लाबाट घटनाको मिसिल, फाइल झिकाएर अनुसन्धान अगाडी बढाइएको प्रहरी उपरीक्षक ओलियाले बताउनुभयो ।
२०८२ वैशाख ९ गते बिहान ४–५ बजेको समयमा राना बेलौरी नगरपालिका–१० शिवनगर निर्मल शारदा आर्यघाट नजिकै मोटरसाइकलसहित जलेको अवस्थामा मृत फेला पर्नुभएको थियो । राना मृत्यु प्रकरणको विगत एक वर्षदेखि विभिन्न कोणबाट अनुसन्धान अगाडी बढाइए पनि प्रहरी निष्कर्षमा भने पुग्न सकेको छैन् ।
घटनाको अनुसन्धानका लागि तीन दर्जन बढी स्थानीयसँग सोधपुछका साथै, मृतकको मोबाइल फोन, छिमेकी, आरोपित लगायतसँग अनुसन्धान गरिए पनि अझै रानाको हत्या गरिएको या आत्महत्या गरेको भन्ने विषय टुङ्गोमा लाग्न सकेको छैन् ।
