लागुऔषधसहित दुई भारतीय पक्राउ

सिराज खान

नेपालगन्ज, वैशाख २६ गते ।जिल्ला प्रहरी कार्यालय बाँकेले यहाँस्थित नेपाल भारत सीमा क्षेत्रमा भारतबाट लागु औषध भित्र्याएर बिक्री वितरण गर्दै आएकाहरूविरुद्ध कडा एक्सन सुरु गरेको छ ।

सोही कारणले दैनिकजसो लागु औषधका कारोबारी र ओसारपसारमा संलग्नलाई प्रहरीले पक्राउ गर्न सफल हुँदै आएको हो ।

पछिल्लो पटक भारतबाट लागुऔषध बेच्न नेपालगन्ज आएका दुई भारतीय पुरुष र महिलालाई प्रहरीले एकै पटक ठुलो परिमाणको खैरो हेरोइनसहित पक्राउ गरेको छ ।

जिल्ला प्रहरी कार्यालय बाँके र लागुऔषध नियन्त्रण ब्युरो शाखा कार्यालय नेपालगन्जको संयुक्त टोलीले भारतको बहराइच जिल्लास्थित रुपैडिहा थानाको बाबागञ्ज बस्ने ३२ वर्षीय मोहम्मद हामिद र सोही स्थानकी २२ वर्षीया सविना देवी पथरकटलाई ६८ ग्राम ८१० मिलिग्राम खैरो हेरोइनसहित पक्राउ गरिएको जिल्ला प्रहरी कार्यालय बाँकेका प्रहरी नायब उपरीक्षक दीपक पातलीले बताउनुभयो ।

उहाँका अनुसार विशेष सूचनाको आधारमा खटिएको लागुऔषध र बाँके प्रहरीको टोलीले नेपालगन्ज उपमहानगरपालिका–५, फुल्टेक्रा जाने बाटोमा उनीहरूलाई शङ्कास्पद अवस्थामा फेला पारी नियन्त्रणमा लिएको थियो ।

त्यसपछि कानुन बमोजिम शरीर तलासी गर्दा मोहम्मद हामिदले लगाएको कालो पाइन्टको दाहिने खल्तीभित्र लुकाई राखेको अवस्थामा खैरो हेरोइन बरामद गरिएको प्रहरीले जानकारी दिएको छ ।

प्रहरी प्रवक्ता पातलीका अनुसार उनीहरूका साथबाट ६८ ग्राम ८१० मिलिग्राम खैरो हेरोइनका साथै घटनास्थलबाट दुई थान मोबाइल फोन र भारतीय नम्बर प्लेट युपी ४० बिएच ४७०८ को मोटरसाइकल समेत बरामद गरिएको छ । 

पक्राउ परेका दुवै जनालाई आवश्यक अनुसन्धानका लागि जिल्ला प्रहरी कार्यालय बाँकेको हिरासतमा राखिएको प्रहरीले जनाएको छ भने उनीहरूसँग सोधपुछ गर्ने कार्य चलिरहेको छ ।

प्रहरीका अनुसार उनीहरू लागुऔषध कारोबार गर्ने भारतकै ठुलो गिरोह रहेको बुझिएको छ । पछिल्लो समयमा प्रहरीले धेरैजना लागु औषध कारोबारीलाई पक्राउ गर्न सफल भएको जिल्ला प्रहरी कार्यालय बाँकेले जनाएको छ ।