जननेता मदन भण्डारीकै मार्गमा एमाले अगाडि बढिरहेको छः सचिव ढकाल

काठमाडौँ, वैशाख १४ गते ।नेकपा एमालेका सचिव भानुभक्त ढकालले पार्टी जननेता मदन भण्डारीले प्रतिपादन गर्नुभएको ‘जनताको बहुदलीय जनवाद’ (जबज) कै मार्गमा सुदृढ ढङ्गले अगाडि बढिरहेको बताउनुभएको छ । 

जननेता मदन भण्डारीको ७५ औँ जन्मजयन्तीको अवसरमा मदन भण्डारी फाउन्डेसनले आयोजना गरेको एक विचार गोष्ठीमा बोल्दै ढकालले उक्त कुरा बताउनुभएको हो । 

सचिव ढकालले मदन भण्डारीले कम्युनिस्ट आन्दोलनलाई बन्दुकको बलमा मात्र राज्यसत्ता प्राप्त गर्न सकिन्छ भन्ने सङ्कीर्ण मान्यताबाट बाहिर ल्याउँदै प्रतिष्पर्धाबाट श्रेष्ठता हासिल गर्ने विचार स्थापित गर्नुभएको बताउनुभयो ।

 ढकालले एमालेको लोकतान्त्रिक अभ्यासले अन्य राजनीतिक दलहरूलाई पनि लोकतन्त्रीकरण हुन बाध्य पारेको तर्क गर्नुभयो ।

 जननेता मदन भण्डारीले भनेझैँ सत्तामा रहँदा पनि पार्टीले सरकार भन्दा जनतालाई नै मुख्य प्राथमिकता दिनुपर्ने मान्यतालाई एमालेले आत्मसाथ गर्दै आएको ढकालको भनाइ छ । 

उहाँले तत्कालीन समयमा ४७ सालको संविधानमा मदन भण्डारीले राखेका २७ बुँदे आलोचनात्मक टिप्पणीहरू नै अहिलेको सङ्घीय लोकतान्त्रिक गणतन्त्रात्मक संविधानको आधारस्तम्भ बनेको उल्लेख गर्नुभयो ।

उहाँले भन्नुभयो, “संविधानको सर्वोच्चता, कानुनको शासन, मानव अधिकार र जनताको अभिमतलाई शिरोधार्य गरेर हिँड्नु नै आजको मुख्य कार्यभार हो, जसमा एमाले अडिग छ । नेपाली कांग्रेसभित्रको आन्तरिक लोकतन्त्र सुधारमा पनि हाम्रो पार्टीले लिएको नीति र अभ्यासको ठुलो योगदान छ ।”

उहाँले मदन भण्डारी फाउन्डेसनलाई एक विशेष सुझाव दिँदै ६२-६३ को परिवर्तनपछि पार्टीलाई कसरी अझ बढी युवामैत्री र प्रविधिमैत्री बनाउन सकिन्छ भन्ने विषयमा गहिरो अनुसन्धान गर्न आग्रह गर्नुभयो । 

प्रविधिको विकासलाई आत्मसाथ गर्दै विचारलाई थप समृद्ध बनाउन फाउन्डेसनको भूमिका महत्त्वपूर्ण हुनेमा उहाँले जोड दिनुभयो ।