साहारा लिम्बू
फुङलिङ, चैत २६ गते । ताप्लेजुङमा भर्याङबाट लडेर एक जनाको मृत्यु भएको छ। फुङलिङ नगरपालिका–४ तिनबरेका ४७ वर्षीय मदन गुरुङको भर्याङबाट लडेर मृत्यु भएको हो ।
बुधबार दिउँसो करिब ३ः३० बजेको समयमा गुरुङ आफ्नै घरमा भर्याङ चढ्ने क्रममा अचानक चिप्लिएर लड्नु भएको थियो । लड्दा उहाँको टाउकोमा गहिरो चोट लागेको थियो । घटना लगत्तै परिवारले उहाँलाई उद्धार गरी करिब ४ बजे जिल्ला अस्पताल ताप्लेजुङमा उपचारका लागि पुर्याउनुभएको थियो ।
उपचारको क्रममै बेलुका करिब ८ बजे उहाँको मृत्यु भएको सूचना अधिकारी तथा प्रहरी निरीक्षक जट्टा सङ्कर यादवले जानकारी दिनुभयो । उहाँका अनुसार घटनाबारे आवश्यक कानुनी प्रक्रिया पूरा भइसकेको छ। मृतकको शव हाल जिल्ला अस्पतालमा राखिएको छ भने पोष्टमार्टम प्रक्रिया हुन बाँकी रहेको जनाइएको छ।
