काठमाडौँ, माघ ४ गते ।अनशनरत स्वास्थ्यकर्मीहरूको माग सम्बोधनका लागि स्वास्थ्य तथा जनसंख्या मन्त्रालयले तीन सदस्यीय वार्ता समिति गठन गरेको छ।
समितिमा मन्त्रालयका प्रवक्ता डा प्रकाश बुढाथोकी, महाशाखा प्रमुख डा.भीम प्रसाद सापकोटा र अस्पताल नर्सिङ प्रशासक नुजन शर्मा हुनुहुन्छ ।
त्यसैगरी, सरकारसँग वार्ताको लागि आन्दोलनरत संयुक्त सङ्घर्ष समितिले वार्ता टोली गठन गरेका छन् । स्वास्थ्य व्यवसायी परिषद् दर्तावाला स्वास्थ्यकर्मीहरूको पाँच वटा पेसागत सङ्गठन तीन दिनदेखि आमरण अनशनमा बसेका छन् ।
नेपाल स्वास्थ्य व्यवसायी परिषद् ऐनको दफा ४(२) र स्वास्थ्य तथा जनसङ्ख्या मन्त्रालयसँग विगतमा भएको सहमति कार्यान्वयनका लागि भनेर सुरु गरिएको आमरण अनशनमा नेपाल सिएमए सङ्घका केन्द्रीय उपाध्यक्ष गोपाल उपाध्याय अनशनमा हुनुहुन्छ ।
नेपाल डेन्टल साइन्स हाइजेनिस्ट एसोसिएसन, नेपाल जनस्वास्थ्य सङ्घ, मेडिकल ल्याबरेटोरी एसोसिएसन, नेपाल सिएमए सङ्घ र हेल्थ असिस्टेन्ट सङ्घ नेपालले गठन गरेको संयुक्त सङ्घर्ष समितिको तर्फबाट उपाध्याय अनशन बस्नु भएको हो ।
परिषद्मा स्वास्थ्यकर्मीहरूको विधागत तथा सङ्ख्यात्मक आधारमा पेसागत सङ्घ संस्थाको प्रतिनिधित्व सुनिश्चित गर्नुपर्ने, साथै नर्स तथा सम्पूर्ण स्वास्थ्यकर्मीहरूका लागि सम्झौता अनुसारको तलब भत्ता तथा सेवा सुविधा तत्काल लागू गर्नुपर्ने माग अघि सारिएको छ ।
नेपाल चिकित्सक सङ्घले, संयुक्त सङ्घर्ष समिति र नर्स सङ्घर्ष समितिले ऐक्यबद्धता जनाएका छन् ।
