वेलिङ्टन, कात्तिक ३ गते । न्यूजील्याण्डको वार्षिक मुद्रास्फीति सन् २०२५ को सेप्टेम्बर त्रैमासिक अवधिसम्ममा ३ प्रतिशत पुगेको छ, जुन अघिल्लो जुन त्रैमासमा २.७ प्रतिशत थियो । यो दर रिर्जभ बैंक अफ न्यूजील्याण्डले तोकेको १ देखि ३ प्रतिशतको लक्ष्य सीमा भित्रको उच्चतम बिन्दुमा पुगेको हो ।
स्ट्याट्स एनजेडका अनुसार, यो दर सन् २०२४ को जुन त्रैमासपछिको सबैभन्दा उच्च हो, जब मुद्रास्फीति ३.३ प्रतिशत पुगेको थियो । मूल्य वृद्धिमा सबैभन्दा ठूलो योगदान आवास र घरेलु उपयोगिता समूहको रहेको छ, जसमा विद्युत, घरभाडा र स्थानीय निकायका कर मुख्य कारक बनेको छ ।
यी वस्तुको संयुक्त प्रभावले उपभोक्ता मूल्य सूचकांकको करिब १७ प्रतिशत हिस्सा ओगटेको छ । विद्युत दरमा वार्षिकरूपमा ११.३ प्रतिशतले वृद्धि भएको छ, जुन १९८९ को मार्च यता कै सबैभन्दा ठूलो वृद्धिदर हो । यसैबिच, औषधि, टेलिकम उपकरण र पेट्रोलको मूल्य घट्दा समग्र मुद्रास्फीति थोरै सन्तुलित भएको देखिएको छ ।
त्रैमासिकरूपमा हेर्दा, उपभोक्ता मूल्य जुन त्रैमासको तुलनामा सेप्टेम्बर त्रैमासमा एक प्रतिशतले बढेका छन् । यो मुख्यरूपमा स्थानीय निकाय कर वृद्धि र मौसमी कारणले तरकारीको मूल्य १२.२ प्रतिशतले बढ्नुका कारण हो । कार्यवाहक अर्थमन्त्री क्रिस बिशपले आगामी सन् २०२६ को पहिलो छ महिनाभित्र मुद्रास्फीति २ प्रतिशततिर झर्ने अपेक्षा गरिएको बताउनुभएको छ, जसले उपभोक्ता र व्यवसायमा परेको आर्थिक दबाब घटाउने विश्वास व्यक्त गरेका छ । रासस/सिन्ह्वा
